Monday, February 13, 2012

PANAGBAKUNA TI ASO, AGTULTULOY A MAIPAKAT

Cabugao, Ilocos Sur – Agtultuloy a maipatungpal ti panagbakuna ti aso wenno uken (3 a bulan nga  agpangato) kadagiti barangay ti Poblasion, segun ken ni Dr. Melvin G. Castro, DVM, Municipal Livestock Inspector.

Kaudian a namalaybalayan da Dr. Castro ket iti Sitio Lusong Suyo, Barangay Baclig idi  Pebrero 10, 2012 a kaduana ti dua a Barangay Tanod babaen ti pannakikoordinar ti Beterinario ken ni Brgy. Captain Ely S. Savella.

Nasapa nga agrekurida da Dr. Castro no mapanda agbakuna nangruna iti nasulinek a barangay.  Segun kenkuana, adda pagmadianna no napudoten ti temperatura ti maindiyeksionan nga ayup. Umabot ti 30 nga aso ti nabakunaan agraman iti sentro ti Barangay idi Pebrero 10, 2012. Maituloy manen inton Pebrero 14, 2012 agingga a mairingpas ti dua a sitio agraman ti Sitio Callaguip.

Paset ti direktiba ni Mayor Edgardo “Ediboy” S. Cobangbang, Jr. ti pannakaipakapet  a dagus dagiti anti-rabies vaccine a naited babaen ti DA-RFU 1 iti napalabas a  lawas para iti LGU-Cabugao.  Kalikagum ti Alkalde ti madadaan a  pannakaprotektar dagiti umili iti peggad ti rabies wenno viral diseases a patauden ti ayup no makakagat.

Kanaig daytoy, imbatad ni Dr. Castro a dakkel met  ti nagnaan ti pagalagadan ti panagtiliw ti warang nga aso. Awanen ti ibbet a binakunaanda ken nadalus dagiti ayup. Innayon ti Beterinario a rebbengna laeng a nadalus dagiti aso a kabbalay ti tao tapno maliklikan pay ti dadduma nga itdenda a sakit.

Inulit ni Dr. Castro a sublianda dagiti saan a nabakunaan nga ayup  gapu ta awan ti akin-aso ngem  no dida kayat a pabakunaan ket iyumanna iti makasakup a Barangay Captain tapno maobligarda nga agpabakuna.

Agtultuloy daytoy a programa ti DA-LGU babaen iti Livestock Section nga idauluan ni Dr. Castro ta adu met latta ti maipasngay nga aso ket apaman a magtengan ti maikatlo a bulanda, masigudda metten a mabakunaan.  # (Web In-Action)

No comments:

Post a Comment