Cabugao, Ilocos Sur – Inawat dagiti lumugar ti Barangay Catucdaan ti nayon ti naited kadakuada a kinalikagumanda a rolyo ti hose manipud iti Gobierno Munisipal idi Pebrero 21, 2012 babaen iti opisina ti General Services Office (GSO) ken Municipal Engineering Office ti Munisipio.
Imbatad ni Kapitan Dominador Seguritan a maitiempo la unay ti kalikagumda a bumarangay gapu ta adda naubbog a paset ti sakaanan ti bantay a mangtannawag iti kapanagan a nakaidarnapan dagiti pagtatalonanda iti barangay.
Gapu itoy, nagaramidda a bumarangay ti pagurnonganda ti danum ket maaw-awagan ti “pison” wenno nasuyod a lungog a pangipatinnaganda ti danum manipud iti ubbog ti aw-awaganda ti “Ramramut” a disso. Gapu ta “siphonic” ti wagas a panagalada ti danum ket maka-menosda ti gasolina. Nausar dagiti hose a naipaay kadakuada ta manipud kadaytoy a pison wenno pagurnongan ket ipasusopda laeng dagiti hose a maiturong kadagiti pagtatalonanda.
Gapu itoy, saanen a maatudan ti dam-eg dagiti mulada a tabako, mais ken nateng iti patad iti panawen ti sig-at gapu iti tulong dagitoy a naipaay kadakuada a hose.
Babaen ti panagtunos dagiti pumurok, makapagbibinglayda ti danum iti sapasap nga usarenda.
Impeksa dagiti opisiales ti barangay ken lumugar ti Barangay Catucdaan ti panagyamanda iti LGU nga idauluan ni Mayor Edgardo “Ediboy” S. Cobangbang, Jr. iti pannakaipaay ti kasapulanda kadagiti mulada a bumarangay. # (Web In-Action)
No comments:
Post a Comment