Cabugao, Ilocos Sur – Nagun-od ti Gobierno Munisipal ti ili a Cabugao, Ilocos Sur nga idauluan ni Mayor Edgardo “Ediboy” S. Cobangbang, Jr. ti Maikadua a Puesto iti resulta ti pasalip ti “SIGLAT AWARDS 2011” babaen iti 25 a Munisipalidad a nagsasalip iti 40 a kategoria. Naangay ti Awards and Recognition idiay Function Room ti Nueva Segovia Consortium of Coopertaives Building, Caoayan, Ilocos Sur idi Pebrero 2, 2012. Nairaman dagiti nangabak iti salip a barangays ti ili a Cabugao a nakagun-od ti adu a pammadayaw ken cash a premio partikular ti Barangay Bonifacio ken Barangay Pug-os.
Panglukat ken pammasangbay a sarita ti impaay ni Board Member Christian “Basi” Purisima. Dinakamatna ti dakkel nga akem ti barangay ken Munisipalidad a naigamulo kadaytoy a pasalip ti Siglat Awards 2011.
Iti anag ti mensahe ni Gov. Luis “Chavit” Singson, binigbigna ti naipangruna a kabaelan dagiti nangabak a Munisipalidad, barangays ken dadduma pay a kategoria ti salip. Innayon ti Gobernador a dagitoy ti kalaingan ken kasiglatan a maibasar iti naiget a panagpili dagiti Hurado. Binigbig pay ni Gov. Chavit ti amin a timmulong nga ahensia ken opisina iti panagballigi kadaytoy a pasalip ti Probinsia.
Pannakamuli ti barangay a kas pangrugian ti nasayud a pannaikapataray ti Gobierno Probinsial agraman kadagiti programa ken serbisio a maited kadagiti umili. Daytoy met ti anag ti panagsarita ni Congressman Ryan Luis V. Singson, First District, Ilocos Sur a maysa kadagiti kangrunaan a sangaili.
Ti partisipasion ti barangay ken Munisipalidad iti salip ket maysa a nasamay a wagas a pangtulong kadagiti dadaulo ti Probinsial ken Munisipal a mangkita kadagiti mainayon pay a programa a mangpasayaat pay ti kasasaad dagiti umili ti bugas ti mensahe ni Vice Governor DV Savellano. Ti Bise Gobernador ti maysa kadagiti nangitandudo ti pasalip ti Siglat Awards. Dinakamatna nga iti mismo koma a bumarangay ti mangaramid/mangbuangay ken mangpatan-ay ti maisalip. Impaganetgetna pay a maitandudo koma met ti livestock sector.
Binagi met ti Pangulo ti Evaluators iti Kapitolio nga imbinsabinsa ti Mechanics ti pasalip a pagbasaran/pamalatpatan ti sumaruno a panagsasalip.
Impamatmat met ti Cabugao Chorale Troupe ti kabaelanna a nangited ti intermission number babaen kadagiti kadaanan a kanta ngem saan a pagkupasen ti panawen ti kaipapananna iti Kultura ken biag ni Ilokano.
Iti pannakaited ti pammadayaw kadagiti nangabak, binayabay ni Vice Gov. DV Savellano ni Diputado Ryan Luis V. Singson a kaduada da Sangguniang Panlalawigan Members , Hon. Christian “Basi” Purisima, Hon. Robert Tudayan, ken Hon. Mario Subagan.
Indauluan ken binayabay met dagiti Mayores ti Munisipalidad ti Ilocos Sur ti delegasion ti LGU-da ken napadayawan a barangays-da, nga isuda Mayor Allen G. Singson nga imbagian ni Hon. Grace G. Singson, Candon City; Mayor Edgardo S. Cobangbang, Jr., Cabugao; Mayor Amado T. Tadena nga imbagian ti kapisi ti pusona, Sto. Domingo; Mayor Marlon B. Ines, Sinait; Mayor Nancy D. Tabanda, San Vicente ken Mayor Constante G. Segundo, Lidlidda.
Iti biang ti LGU-Cabugao, kadua ni Mayor Ediboy a nangbayabay kadagiti napadayawan ket isuda: Sangguniang Bayan Member Vicky S. Serna, SBM Carlito S.Pano, M.D., LGO Officer Connie Quinola, Municipal Treasurer Lourdes A. Azcueta, opisiales dagiti napadayawan a barangays ken empleado ti opisina ti LGU. # (Web In-Action)
SIGLAT BARANGAY WINNER CABUGAO ENTRY
Best Performing Barangay | Pug-os |
Most Healthy Barangay | Pug-os |
Best in Barangay Intensive Gardening | Pug-os |
Best in Nutrition Program Implementation | Bonifacio |
Best Barangay Herbary | Bonifacio |
Best in Persons with Disabilities Program Implementation | Bonifacio |
Best in Erderly Program Implementation | Bonifacio |
Outstanding Brgy. Nutrition Scholar | Macrina Saturno, Brgy. Bonifacio |
Most Functional Brgy. Anti-Drug Abuse Council (BADAC) | Aragan |
Outstanding Lupong Tagapamayapa | Aragan |
Best Innovative Practice | dardarat |
SIGLAT BARANGAY 1st RUNNER-UP (Major Category)
Most Child Friendly Barangay | Dardarat |
Best in Agricultural Productivity | Turod Patac |
Best in Fish Production | Salomague |
Outstanding Sangguniang Barangay | Pug-os |
Outstanding Punong Barangay | Pug-os |
SIGLAT BARANGAY 2nd RUNNER-UP (Major Category)
Cleanest & Greenest Barangay | Pug-os |
No comments:
Post a Comment