DUA A GAKAT, NATRATAR ITI PUBLIC HEARING

Cabugao, Ilocos Sur – Dua a napateg a gakat ti natratar iti naisayangkat a Public/Committee  Hearing a dinar-ayan dagiti Sangguniang Bayan Members nga idauluan ni Vice Mayor Danny Q. Gazmen, Kapitanes ti Barangay, dadaulo ti eskuela-publiko: sekundaria ken elementaria ken dadaulo ti opisina ti LGU a naangay iti SB-ABC Hall idi Pebrero 7, 2012.

Umuna a natratar ti pannakaaramid ti Abril 24  a “Sakada Day”. Ni SB Member Benedicto M.  Savellano, Chairman, Committee on Rules ti nang-preside ti hearing. Segun ken  ni SBM Savellano, maadaptar ti “Sakada” agsipud ta  isimbolona dagiti  napan nagtrabaho  iti sabali a pagilian kas   nairekord iti Historia ti Ili. Dagitoy dagiti  trabahador a nagluas  iti Puerto ti Salomague ken naglugan iti barko a napan nagobra  kadagiti Plantasion ti unas  idiay  Estado ti Hawaii. Napili ti Abril 24 a pakaiyaldawanna gapu ta dayta a petsa ti  Piesta ti ili a  para   ti Balikbayans. Innayon ti Konsehal a  pangbigbig pay  ti kinasiasino  dagitoy a   Migrante iti  maaramid a linteg.

Nupay kasta, adda met nangisingasing a manayonan ti balikas a Sakada kas koma iti : “Sakada and Balikbayans Day” tapno mairaman dagiti nagnaeden idiay sabali a pagilian ken dagiti Overseas Filipino Workers (OFW’s). Mairaman daytoy iti pannakatamingna  iti session ti SB. 

Awan ti nangsupiat kadaytoy a gakat ngem nairekord latta  dagiti dadduma pay a  singasing ken pakaseknan ta  mairamanda a mapagsasaritaan iti panag-sesion ti Sangguniang Bayan.

Iti sabali a bangir, natratar ti gakat a pannakai-pribado ti panagkolekta ti basura. Nag-Preside ni SB Member Jemaima Tan-Yee, M.D.  Imbinsabinsana ti konsepto ti pribado a kompania a mangimanehar ti pannakaidalimanek/pannakakolekta ti rugit. Innayonna a babaen iti ramitda, mapagbalinda nga organiko a ganagan dagiti “nabubulok” a klase ti basura a pakabenepisiaran dagiti umili.

Dagiti kangrunaan a   serbisio nga idiaya ti pribado a kompania kas nailawlawag:

• Nasaknap a pannakaipaawat  ti pakabuklan ken kaipapanan   ti Solid Waste Management kadagiti barangay. 
• Maadalan  ti tunggal barangay iti wagas   a panangsimpa ti basura (Information education  campaign) agraman iti coastal barangays. 
•  Teknikal a kabaelan iti pannakapagbalin ti  marupsa  (nabubulok) a rugit nga  organic  a ganagan gapu iti mausar a ramit. 
•  Naan-anay a maipakat  ti segregasion (No segregation, no collection). Nupay kasta, mainayon  daytoy a matratar  iti session ti SB.

Innayon pay ni ABC President Thaddeus U. Soller a maipakat ti pannakapaadda ti compost pit ti tunggal balay ta adda  maitulong daytoy  iti aramid a  segregasion ken  pannakamantener ti operasion ti Material Recovery Facility (MRF) para kadagiti saan nga agrupsa  a basura a pakabenepisiaran latta  dagiti umili ta malako met dagitoy.

Iti nasao a public hearing, nadengngeg pay  ti pakaseknan dagiti nagatendar a pannakabagi  ti eskuela ken ospital iti pakaseknan   iti Solid Waste Management.  Nupay kasta, daytoy a gakat ket mapagsasaritaan  iti session ti  Sangguniang Bayan sakbay a maipinal ti pakabuklanna. # (Web In-Action)