Thursday, February 23, 2012

TALLO A BARANGAY TI NAGSERBISYUAN TI DENTAL SERVICE TI RHU

Cabugao, Ilocos Sur  – Naaramid ti maikapat nga eskediul ti Information Education Campaign on Dental Health Care/Distribution of Dental Health Care Gifts ita a Pebrero 23, 2012 iti Brgys. Aragan, Alina-ay ken Turod Patac. Indauluan ni Dra. Ma. Anastacia de los Reyes, DMD, ti grupo ken inasistiran dagiti pannakabagi ti RHU Cabugao nga idauluan ni Dr. Lotgarda Tayao, Municipal Rural  Health Physician.

Iti imatang dagiti nagannak nga agbantay, mangisursuro ti Day Care ken dagiti ubbing, umuna nga ilawlawag ti Dr. de los Reyes  ti panggep ti nakaumayan ti grupoda. Adda iggemna a masasao a “Module” a pakabuklan ti gugot ken ngipen tapno maimuestrana kadagiti ubbing/nagannak pay  ti umisu a panagsugigi. Innayon ti Dentista a tallo minutos ti kapaut ti panagsepilio ken mamitlo ti kada aldaw tapno nasalun-at ti ngipen ken gugot.

Iti Barangay Aragan, adda 31 a bilang ti Day Care Children nga isuro ni Mrs. Lyzette Urbien, Day Care Teacher a nataming  kasta met a 20 nga ubbing met ti na-check up ti ngipenda iti Brgy. Alina-ay nga isuro ni Ms. Joy Rondon, Day Care Teacher  idinto ta 18 met ti bilang ti ubbing idiay Brgy. Turod Patac nga isuro ni Mrs. Evangeline B. Gabriel, Day Care Teacher. Agpapada pay amin dagitoy a mangar-aramid iti panagpakan (Feeding)  kadagiti ubbingda  manipud ti Lunes agingga iti Biernes. 

Naragsakan met ti tunggal ubbing  a naikkan ti sagut (Toothbrush, Toothpaste, Tumbler ken Bear Brand Milk) nga inted ti LGU babaen ti liderato ni Mayor Edgardo “Ediboy”  S. Cobangbang, Jr. agraman ti Committee on Health/Social Services ti Sangguniang Bayan nga idauluan ni SB Member, Dr. Carlito S. Pano.

Impeksa dagiti nagannak, ubbing, mangisursuro ken lumugar iti panagyamanda iti Gobierno Munisipal ken ti DOH-RHU  iti pannakairusat daytoy a pannakatagiben ti salun-at ti ngipen iti barangay  nangruna kadagiti ubbing.

Nagasistir da Miss Joy Sayo, Miss Giline Castillo ken Ms. Shirley Solar, agpapada a pannakabagi ti RHU Cabugao iti naaramid a dental service.  # (Web In-Action)

No comments:

Post a Comment