Cabugao, Ilocos Sur – Naaramid ti pannakaiyawat dagiti sertipiko ti pammadayaw kadagiti barangays a nag-entries para iti Siglat Awards 2011 a nakagun-od ti puesto iti nagduduma a kategoria iti imatang ti Pamilia- LGU nga idauluan ni Mayor Edgardo “Ediboy” S. Cobangbang, Jr. kalpasan ti Flag Ceremony ita nga aldaw, Pebrero 6, 2012 ditoy Munisipio ti Cabugao.
Naigiddan iti dayta a gundaway ti pannakabigbig ti pammadayaw a nagun-od ni Ms. Constancia “Connie” L. Quinola, Local Government Operations Officer 5 ti DILG-Cabugao a kas “Top Performer” manipud iti DILG-Ilocos Sur Provincial Operations Office maigapu iti naan-anay a panangipatungpalna ti programa, proyekto ken aktibidades ti DILG iti Munisipalidad ti Cabugao babaen iti nakalidad a gapuanan, naitiempo a pannakaisubmiter dagiti reports ti opisinada ken ti naan-anay a pannakikammayet ti opisina ni Ma’am Connie iti Gobierno Munisipal ti Cabugao nga idauluan ni Mayor Ediboy iti aktibidad nga inyimplimentar ti DILG-MLGOO.
Nagyaman ni Ma’am Connie kalpasan nga awatenna ti pammadayaw iti tulong dagiti adda iti LGU ken opisiales ti Barangay.
Kinablaawan ni Mayor Ediboy dagiti nakagun-od ti pammadayaw iti amin a benneg ti Siglat Awards. Kunana a pagwadan dagiti nangabak a barangays kadagiti padada ket babaen ti nagun-odda a balligi ket mangnamnama a makikaysanto metten dagiti dadduma a barangays a makipaset kadaytoy a pasalip.
Inulit ni Mayor Ediboy nga impeksa kadagiti kakaduana ti LGU iti agtultuloy latta a pannakaipaay ti napintas a serbisioda nga agresulta iti agtultuloy met a pannakapasayaat ti kasasaad ken panagbiag dagiti umli.
Nakitinnulong ken ni Mayor Ediboy iti pannakaipaay dagiti pammadayaw da Vice Mayor Danny Q. Gazmen, SB Member Vicky S. Serna, SB Member Carlito S. Pano, M.D. ken SB Member Josefina S. Vallejo. # (Web In-Action)
No comments:
Post a Comment