Cabugao, Ilocos Sur – Naisayangkat ti Tree Marking babaen kadagiti pannakabagi ti Environment Natural Resources Office (ENRO), Ilocos Sur Provincial Office iti agsumbangir ti Kalsada Nasional iti masakupan ti ili a Cabugao, Ilocos Sur idi Pebrero 15, 2012.
Sakbayna, nakikoordinar dagiti pannakabagi ti ENRO iti Opisina ni Mayor Edgardo “Ediboy” S. Cobangbang, Jr. tapno ipakaammoda ti pannakagtengdan iti ili ti Cabugao iti pannakamarka dagiti pinuon ti kayo iti agsumbangir nga igid ti Kalsada Nasional (boundary to boundary) ti Probinsia ti Ilocos Sur.
Segun ken ni Mrs. Lolita N. Tugas, Community Development Assistant 1, daytoy nga ipatpatungpalda ket sinaguday ti maysa a Provincial Ordinance ti Hunta Probinsial babaen iti panangaprobar ni Gov. Luis “Chavit” Singson a pannakaimbentario ti pinuon ti kayo iti agsumbangir ti National Highway iti intero a Probinsia.
Kaipapananna daytoy a mapreserba dagitoy a pinuon ket saan a mabalin a pukanen ken usaren malaksid no makapermiso ti maseknan iti Opisina ti Gobernador.
Segun pay ken ni Mr. Eusebio P. Abero, CDA 1, P1, 000 (Sangaribu a Pisos) ti multa ti umuna a pannakatiliw/aglabsing iti ordinansa; P2,000 (Duaribu a Pisos) iti maikadua a panaglabsing; ken P5,000 (Limaribu a Pisos) ti maikatlo a panagbasol ken ma-impound ti napukan a kayo a pabor iti Gobierno Probinsial.
Maysa a panggep ti pannakapagtalinaed dagiti pinuon iti pannakatulongda a mangagsep ti polusion nga itden ti asuk ti lugan tapno mabalanse ti ecosystem ken pagbasaranda kadagiti maigannuat a plano para iti dadduma a programa a mangpasayaat ti aglawlaw kalaksidan ti Reforestation and Greening Program ti Gobierno.
Kanaig daytoy, segun ken ni MENRO Edgar S. Balangatan ti LGU Cabugao a paset ti pagrebbenganna a makikoordinar kadagiti opisiales ti barangay a makabatog iti Kalsada Nasional para iti regular monitoring ken panangpakaammo kadagiti tao maipapan kadaytoy a programa ken pagalagadan ti Gobierno Probinsial. # (Web In-Action)
No comments:
Post a Comment