Wednesday, February 22, 2012

BARANGAY HEALTH CLINIC, NAARAMID ITI BARANGAY NAMRUANGAN

Cabugao, Ilocos Sur  – Naisayangkat ti Barangay Health Clinic a programa ti Cabugao Rural Health Unit (RHU)  babaen ti panangidaulo ni Dra. Lotgarda Tayao, Rural Health Physician kadagiti lumugar ti Barangay Namruangan, Cabugao, Ilocos Sur idi Pebrero 21, 2012 (nagmalmalem).

Segun ken ni Dr. Tayao, kaaduanna dagiti sintomas ti sakit a naamiris iti bilang ti  158  a nagparikna ket  iti Upper Respiratory Tract Infection (URTI) ti kaaduan a nataming  maigapu iti panagbaliwbaliw ti klima. Naipaay met dagiti mayataday nga agas a masagsagana a naited kadagiti nagpaagas.

Iti malem, nagmiting dagiti kameng ti 4P’s (Pantawid Pamilyang Pilipino Program) iti nasao a barangay. Napagsasaritaan iti naan-anay a panangannurot dagiti benepisiario ti 4P’s tapno matun-oyan ti husto a panggepna nangruna kadagiti maseknan nga ubbing.  Nayadal pay  kadakuada ti konsepto ti Family Planning. Naited pay ti Birth Plan Form kadagiti agdadagsen nga inna. Naglektiur iti nasao a development session  da Mrs. Gloria Sesuca ken Mrs. Elvira  Satumba, agpada a pannakabagi  ti RHU Cabugao iti  pakaseknan ti programa ti 4P’s. 

Naregget met a nakikaysa dagiti Barangay Health Workers (BHW), Barangay Nutrition Scholars (BNS) babaen ti panangtarabay kadakuada  ni Barangay Captain Robertson “Bongbong” Gorospe. Indauluan ti agkabannuag a kapitan dagiti kalugaranna a  nangipeksa ti panagyamanda iti LGU Cabugao nga idauluan ni Mayor Edgardo “Ediboy” S.  Cobangbang, Jr. kadaytoy a programa ti salun-at iti Opisina ti RHU Cabugao. Innayon ti Punong Barangay  a dakkel ti naitulong  ti serbisio-medikal  kadagiti kalugaranna iti  pannakatamingda/pakalag-ananda unay    no idilig iti kinangina ti panagpaagas ita no addaan ti sakit ti maysa a bumarangay.

Nagasistir met  dagiti pannakabagi ti RHU Cabugao a da Mrs. Teresita Bana, Miss Jennifer Rabor, Miss Rachelle Serrano, Miss Pamela Raquenio, ken Miss Angelica Jzarine B. Sunio.  # (Web In-Action)

No comments:

Post a Comment