Tuesday, February 14, 2012

TI DAY CARE CENTER, BRGY. SAGAYADEN

Cabugao, Ilocos Sur  – Napintas ti “partnership” ti mangisursuro  ken nagannak kasta met iti Barangay ken LGU. Daytoy ti kangrunaan a makagapu ti pannakaipasdek ti Day Care Center Building ti Barangay Sagayaden, imbatad ni Mrs. Evelyn Tapiceria,  Day Care Teacher ti nasao a pageskuelaan.

Segun iti Day Care Teacher, adda 18 nga ubbing nga isurona ti bigat ken 14 ti bilangda iti malem. Dati a makisalinongda iti panagklaseda iti Barangay Hall. Ngem ita, natalgeden ti pagyananda nga agklase ken adda makuna a kabukbukodanda a pagpusiposan.

Adu ti pakakitaan ti napintas a panagdanggay ti mangisursuro ken nagannak ditoy a pageskuelaan, impaneknek  met ni Mr. Gilbert Asuncion, Head Teacher ti Sagayaden Elementary School  a nakaipasdekan ti nasao a Day Care Building.

Segun ken ni Mrs. Tapiceria, aktibo dagiti nagannak ti ubbing a makigamulo iti pagsayaatan iti eskuela. Addan  sumagmamano a nabakirda nga aruaten ken ramit ti uneg ti  eskuela. Maysa ti usarenda iti Educational Film Viewing nga epektibo a pangnayon ti adalen dagiti ubbing.

Day Care Center ti Barangay Sagayaden, Cabugao, Ilocos Sur


Sangsangkamaysa dagiti mangisursuro ken bumarangay  nga idauluan ni Barangay Captain Virgilio Piros iti panagyamanda iti Gobierno Munisipal nga idauluan ni Mayor Edgardo “Ediboy” S. Cobangbang, Jr. iti pannakaipasdek ti nasao a Day Care Building manipud iti Municipal Share ti RA 7171 ken  kadagiti pay  mainayon a pagimbagan ti eskuela ken ubbing iti Barangay Sagayaden. # (Web In-Action)

No comments:

Post a Comment