Cabugao, Ilocos Sur – Babaen iti lumawlawa a “linkages” ti LGU-Cabugao nga idauluan ni Mayor Edgardo “Ediboy” S. Cobangbang, Jr. kadagiti line agencies nangruna iti Departamento ti Agrikultura (DA), maiyusuat ita ti panagmula ti Hybrid a Kamatis (off-season type) sadiay Brgy. Marga-ay, Cabugao, Ilocos Sur babaen iti panangtarawidwid ni Mr. Nathaniel Galamgam, AT/DA-LGU babaen ti panangmulada kadagiti kakaduana iti 1,200 metro-kuadrado a pagmulaanda ita a bulan ti Setiembre 2013. Segun iti Technologist, maapit ti imulada inton matapogan ti Disiembre 2013 a kakirang ti suplay ti nateng ket manamnama a mapadasanda ti aglako iti P30/Kilo a bayad ti maapitda.
Innayon ni Mr. Galamgam a kayatda nga iparugi ti kastoy a tiempo daytoy a nateng ditoy nga ili tapno adda pagtuladan dagiti mannalon a mayat a mangliklik iti oversupply iti merkado a manglugi ti kaaduan nga agmulmula no surotenda ti daan a tiempo ti panagmulada.
Daytoy a gannuat ken programa ket nagbuligan nga isayangkat ti DA-LGU Cabugao ken Graduate Studies ti Agrikultura, MMSU, Batac City, Ilocos Norte. # (Web In-Action)
No comments:
Post a Comment