Friday, September 20, 2013

RECHANNELING TI CABUGAO RIVER, TIPED TI LAYUS

Cabugao, Ilocos Sur – Maysa kadagiti naindaklan a gandat ti LGU-Cabugao nga idauluan ni Mayor Edgardo “Ediboy” S. Cobangbang, Jr. ti mangikanawa ti pakadidigraan dagiti umili babaen iti panangtamingda  iti pakaseknan ti ayus ti karayan.

Agtultuloy ti Rechanneling Program ti Munisipio nangruna no kaababaw ti danum ti karayan tapno maipakni iti agsumbangir nga  igid dagiti naurnong a darat, bato ken siltation tapno nasayud latta ti panagbulanos ti ayus uray napigsa ti tudo.

Malaksid iti asideg ti Poblasion, mairamraman met a makar-inan dagiti  barangay a mabatogan ti karayan kas iti Brgy. Maradodon, Catucdaan, Cael-layan Alina-ay, Carusipan, Arnap ken Aragan babaen ti pannakikammayet ken pannakitinnulong dagiti Opisiales ti barangay kadagitoy a lugar.

Manamnama nga iti agtultuloy a pannakakadkad ti tukot ti karayan ket maliklikan ti panagbunnong ti danum ket nasayud ti pannakaguyod dagiti ayus nga aggapu iti drainage canal/outlet iti nangatngato a disso.

Dagitoy  nga aksion ken inisiatiba ket resulta ti napintek a programa ti Gobierno Munisipal a mangprotektar ken mangikanawa ti pannakadidigra dagiti umili nangruna kadagiti agnanaed iti igid ti karayan no dumteng ti kalamidad. # (Web In-Action)

No comments:

Post a Comment