Cabugao, Ilocos Sur – Agtultuloy ti pannakaited ti mainayon a pagtaraon dagiti babassit nga ubbing (Day Care Children) kadagiti Day Care Centers iti 33 a barangay ti Munisipalidad ti Cabugao iti agdama.
Daytoy a programa ti LGU-Cabugao babaen ti panangimaton ti Opisina ti MSWDO ket saklawenna ti innem a bulan manipud ti panangrugina tapno naan-anay a maipasigurado a masustentuan ti umisu a sustansia dagiti ubbing kabayatan a mataraonan met ti panunotda iti adal.
Iti pannakiuman ti Web In-Action kadagiti Day Care Worker/Teacher nga umay agala ti suplay-da a bagas iti Munisipio, impakaammoda a naballigi daytoy a programa ti Munisipio nangruna ita a lean months ket pagyamyamanda unay iti Gobierno Munisipal ta maikkan ti importansia dagiti ubbing a maikkan ti nayon a pagtaraon tapno maipasigurado ti napintas a pundasion iti iyaagpangda iti nangatngato a tukad ti adal.
Kanaig daytoy a suplementar a taraon, maragsakan met dagiti nagannak kadagiti ubbing ta uray kaskasano ket matulongan met dagiti annakda babaen iti Munisipio ken iti barangay iti panagtan-ayda nga agbalin a nasayaat a makipagili. # (Web In-Action)
No comments:
Post a Comment