Cabugao, Ilocos Sur – Nupay saan a naggigiddan ti panagtalon dagiti mannalon ti Cabugao, Ilocos Sur gapu iti nabattaway a tudtudo a sa laeng agpigsa no adda sumungad a bagyo wenno Habagat. 
Segun iti DA-LGU Office, naimonitorda a naikagumaananda latta dagiti naudi a nagtalon a naisambot ti pannakaraep dagiti pagtatalonanda gapu ta narayray ti namnamada nga adda maapitda kadaytoy a panagtatalon (Wet Season, Hunio-Nobiembre).
Nupay kasta, addan sumagmamano nga aggagapas iti napattopattok a disso kadagiti barangay dagiti nakauna a nagtalon a nangruna kadagiti adda kabukbukodanda a pananuman. Kaaduan a nakayuna ket dagiti pagtatalonan iti nababa a disso ken lungog, adda irigasionna, ken small farm reservoir-na ket nadaras ti pannakapatan-ay dagiti raep gapu iti umdas a nausar dagiti nagtalon kas iti ganagan, pagisprey ken pagtangdan ti agdalus (roguing) iti baet dagiti pinuon.
Iti sabali a bangir, saan pay a masinunuo no adda epekto ti tallo a naglabas a bagyo kadagiti naapit iti agdama ken madama nga agtantan-ay ita a naudi a naimula a pagay.
Kabayatanna, mapatta-patta a matun-oyan latta ti 6-7 Tonelada (kada ektaria a pagbasaran) iti maapit kadagiti Municipal Techno-Demo Farm Areas nga inyusuat ti DA-LGU ita a Wet Season 2013, impanamnama ti DA-LGU Cabugao. # (Web Situational Report)
No comments:
Post a Comment