Cabugao, Ilocos Sur – Umad-adu dagiti Koridor ken agtagikua ti trakan a makidayo ditoy Cabugao Dayo kas iti aggapu iti Umuna a Distrito ti Ilocos Sur ken taga-Urdaneta, Pangasinan a makipaset ti transaksion iti kaaldawan ti Dayo kas iti pannakagatang ti baka ken nuang.
Iti pannakiuman ti Web In-Action idi Setiembre 14, 2013, impakaammo ni Dr. Melvin G. Castro, DVM, Municipal Livestock Coordinator a napintas ti koordinasion ken koneksion dagiti Koridor ditoy nga ili nga idauluan ni Cabugao Livestock Coordinator Marciano Raciles, Jr. kadagiti sabsabali a Dayo tapno agawisda ti Koridor a mangpaadu ti maaramid a transaksion iti panaggiginnatangda iti animales.
Dagitoy nga inisiatiba ket resulta ti napintas a pannakatarabay ti Cabugao Dayo babaen ti panangitandudo ti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno dumur-as ti industria ti livestock iti Munisipalidad a katulongan dagiti mannalon a mayoridad a kameng ti umili. # (Web In-Action)
No comments:
Post a Comment