Cabugao, Ilocos Sur – Kabayatan iti transition period a pannakaiyallawat ti pannakaoperar ti Ecology Center ti LGU-Cabugao, naaramid ti Orientation/Briefing dagiti empleado ti Solid Waste Management Program ti Munisipio nga allawaten ti kompania a nakikontrata iti LGU iti nasamay a pannakatagiben ti sanitary land fill/dumpsite a masarakan iti Sitio Baliw, Brgy. Quezon, Cabugao, Ilocos Sur.
Iti pannakiuman ti Web In-Action iti pannakabagi ti Luzon Green Art Technology, Inc. a nang-briefing kadagiti Solid Waste Personnel itay nabiit, impakaammona a nupay maisapribadon ti operasion ti Ecology Management ti Munisipio ket adda latta paset ti Municipal Environment Natural Resources Officer a makikokoordinar iti Kompania nangruna iti pannakaipakat ti sinaguday ti Memorandum of Agreement (MOA) a nagpipinnirmaan ti Munisipio ken dagiti pannakabagi ti Kompania.
Insupusop pay ni MENRO Balangatan a babaen daytoy a rusuat ti Munisipio ket mayagpang pay ti kapabilidad ken agtultuloy a napintas a pannakaidalimanek dagiti basura babaen met laeng ti pannakitinnulong dagiti maseknan nga umili. # (Web In-Action)
No comments:
Post a Comment