Cabugao, Ilocos Sur – Naangay ti Monthly Regular Meeting dagiti Opisiales ti Cabugao Federated Vegetable Growers and Producers Association nga idauluan ni Kagawad Armando Azcueta, Presidente, iti Opisina ti DA-LGU Cabugao iti 2nd Floor Municipal Building.
Kangrunaan a natratar ti panamagsaganada nga agmula iti nadumaduma ti klasena a nateng ken cash crops kadagiti barangay a masakupan ti asosasionda. Nakipaset met ni Mayor Edgardo “Ediboy” S. Cobangbang, Jr. iti nasao a panagtataripnong a mangipasimudaag iti agtultuloy a suporta ti LGU-Cabugao kadagiti gannuat ken plano ti Pederasion iti pannakaitandudo iti panagmula ti nateng.
Kanaig daytoy, impeksa ni Presidente Azcueta iti naan-anay a panagyamanda ken agraman dagiti kakaduana nga Opisiales iti napintas a kammayet ti Pederasion ken ti LGU-Cabugao nga idauluan ni Mayor Ediboy, iti OPAG-Ilocos Sur, DA-RFU 1 (HVCDP Program) ken ti Opisina ni Gobernador Ryan Luis V. Singson iti pannakaipamaysa ken pannakaisaknap ti panagmula ti nateng iti intero a probinsia kas kangrunaan a katinnulong ti bagas a pagtaraon a mangipanamnama ti agtultuloy a napintas a salun-at ti sangkaprobinsiaan.
Natratar pay ti nasayud a pannakaipatungpal ti Pinansial a kasasaad dagiti asosasion, ti pannakaorganisar dagiti asosasion ti agpatpatanor ti nateng kadagiti away, iti pannakamantener ken pannakapaaktibo ti transaksion ken operasion ti temporario a bagsakan iti igid ti highway ken iti merkado iti maprodukto a natnateng iti agdama ken iti masanguanan. # (Web In-Action)
No comments:
Post a Comment