Cabugao, Ilocos Sur – Agtultuloy a maus-usar ti inted ti LGU-Cabugao nga espasio para iti “Bagsakan ti Nateng” iti igid ti Kalsada Nasional iti asideg ti NISTC Public Market, Cabugao, Ilocos Sur.
Iti pannakiuman ti Web In-Action idi Pebrero 19, 2015, kinuna dagiti agipalpalugan ti nateng a kapigsa ita a bulan ti Pebrero iti panagipatulodda iti nateng a maangkat ken mailako idiay Urdaneta, Pangasinan, Balintawak, Quezon City ken Divisoria, Quiapo, Manila kasta pay iti nadumaduma nga ili ti Cagayan.
Innayon dagiti agipalpalugan a nangrugida a nagoperar idi Nobiembre 2014 ken agpatingga inton Mayo 2015 iti mapatta-patta a panagbassit ti mailakoda a nateng.
Imbatad ni Mr. Armando Azcueta, Presidente, Cabugao Vegetable Growers and Producers Association nga umab-abot ti 10 Tonelada ti bulto iti nateng a maibiahe a mairuar nga aggapu iti ili iti unos ti 24 oras ti kada aldaw no kapigsana. # (Web In-Action)
No comments:
Post a Comment