Cabugao, Ilocos Sur – Naangay ti Pre-Marriage Counseling Seminar dagiti agassawa a makipaset iti maangay a “Mass Wedding” ditoy Munisipio iti panangannong ni Mayor Edgardo “Ediboy” S. Cobangbang, Jr. itoy a bulan ti Pebrero 2915.
Naangay ti panagtitipon iti Conference Hall iti SB-ABC Building idi Pebrero 20, 2015 ket nagpaay a Resource Speaker da MSWD Officer Mrs. Lydia S. Gazmen ken ni Mrs. Janet Sison, Public Health Nurse ti RHU-Cabugao.
Iti nasao a seminar, impasagepsep dagiti Resource Person iti napintas ken natunos a panagdenna dagiti agassawa a mangbangon iti natibker ken naragsak a pamiliada.
Napalagipanda pay maipapan iti annuroten iti Family Planning.
Kabayatanna, nagpalista dagiti agkakasar iti Opisina ni Municipal Agriculturist Zenaida S. Andrada ti DA-LGU para iti panagalada iti “Love Tree” a kasapulan nga imulada a kas panangannurot iti pammilin ti maysa nga Ordinansa ti Ili a maiyaplikar kadagiti apagassawa sakbay iti panagkasar dagitoy.
Segun ken ni Mrs. Rosario S. Abara, Municipal Civil Registrar, umabot iti 26 a bilang ti agparis nga agassawa a nagparehistro para iti nadakamat a Mass Wedding Program ita a Tawen 2015. # (Web In-Action)
No comments:
Post a Comment