Cabugao, Ilocos Sur – Agtultuloy nga idauluan ti Grupo ti Clean and Green Program ti Munisipio nga idauluan ni MENRO Edgar S. Balangatan, AT, iti pannakadalus dagiti parke, plaza, kalsada-nasional, processional roads, public facilities iti Poblasion, aglawlaw ti Munisipio ken iti NISTC Public Market kasta metten iti pannakaitandudo ti Solid Waste Management Program kadagiti service barangay ti LGA Tech., Inc. ken ti LGU-Cabugao.
Inggunamgunam ti MENRO-Cabugao a kakokoordinarda dagiti Opisiales ti Barangay ken bumarangay nangruna iti asideg ti Poblasion nga aramidenda koma iti pasetda iti panagdaldalus tapno makomplementaran ti ar-aramiden ti LGU ken dalusanda dagiti mabatoganda a paset dagiti Barangay Roads-da, Provincial Road, Processional Roads ken iti National Highway.
Kabayatanna, imbatad ni MENRO Edgar S. Balangatan a babaen iti regular a panagmonitor-da ket maar-aramid met ti regular coastal clean-up nga isayangkat dagiti nadumaduma a sektor kadagiti pito a barangay iti igid ti baybay.
Innayon ti MENRO a dagitoy nga aksion ken inisiatiba ket ilungalong a kanayon dagiti Opisiales ti Munisipio nga idauluan ti Chief Executive ken dagiti Kapitanes ti Barangay tapno mamantener iti kinadalus ken kinapintas iti mabuybuya iti aglawlaw para iti mapasungadan manen a pannakarambak ti Semana Santa ken panagpiesta ti ili ken panagsangpet dagiti Bakasionista ken Balikbayan ditoy ili ti Cabugao. # (Web Situational Report)
No comments:
Post a Comment