BRGY. CARUSIPAN: PANAGTUTUNOS A DUMUR-AS TI RAGPATENNA

Cabugao, Ilocos Sur – Iti pannaki-amad ti Web In-Action kadagiti agindeg iti  Barangay Carusipan, imbatadda a pagyamananda unay iti Gobierno Munisipal nga idauluan ni Mayor Edgardo “Ediboy” S. Cobangbang, Jr.  iti panangilungalongda iti pannakasemento ti sumrekan ti barangay. Innayonda a manam-ayanda kadaytoy a nainayon a pagsayaatan ti dalanda ta nalakada nga iruar dagiti produktoda.

Ti pannakapasayaat dagiti kalsada ti barangay ken sitio  ket agtultuloy a programa ti LGU-Cabugao tapno ma-motibar dagiti mannalon nga agsaldet pay nga agmulmula ta nadarasda a maibiahe dagiti apitda ken nasimpa ti pagnaanda nga agudong ken umaway. 

Maysa kadagiti kangrunaan  a proyekto a naipatungpal iti Brgy. Carusipan ket  ti pannakaaramid ti River Control (rubble masonry)  iti umabot ti 200 a metros a naipaurnos iti karayan ken 50 metros a  pabaribar tapno maiturong ti ayus ti danum ti karayan ket maprotektaran dagiti sanikua ti bumarangay iti igid  ken pasilidad ti barangay a dumna a  kurukoren ti danum no pumigsa ti ayus.  

“Pagyamananmi unay  a lumugar ken   ni Mayor Ediboy ta adda  makinaria ti Munisipio  a nakabael a mangkadkad ti gabor ti karayan ken ti naaramid a river control a mangneutralisa  ti ayus,” imbatad ti kaaduan a lumugar.

“Dakkel a trinsera ti kalamidad nangruna ti layus daytoy nga  pannakaasikaso ti pangtiped ken pangiturong ti ayus ti karayan. Bigbigenmi unay a proyekto daytoy ket agyamankami kada Mayor Ediboy ken ni Apo Governor Ryan,” kinuna pay ti dadduma a lumugar iti nasao   a barangay.

Ti Barangay Carusipan ket pagnaedan ti 600 a Pamilia. # (Web In-Action)

SIGLAT AWARDS 2014
Champion
Most Healthy Barangay 

Ist Runners-up
Outstanding BHW; 
Most Functional Botikang Barangay

SIGLAT AWARDS 2013

Champion

Outstanding Barangay Health Worker 

SIGLAT AWARDS 2012

Outstanding BHW, 1st Runner-up, Carusipan  # (Web In-Action)