Monday, February 9, 2015

TABAKO TI KALAWAAN A NAIMULA ITI DRY SEASON 2014-2015

Cabugao, Ilocos Sur – Iti pannakiuman ti Web In-Action itay nabiit, impakaammo ni Mr. Tomasito Taloza, Head, Cabugao NTA Area a kaaduan ita ti namulaan a pagtatalonan iti ili a Cabugao  iti Virginia Tobacco iti Dry Season 2014 – 2015 (Nobiembre-Mayo).  

Kabayatanna, adda met dagiti nakauna a nagmula ta nalaka a nasig-atan dagiti minulaanda a disso idinto ta naud-udi dagiti nadam-eg a disso.

Innayon ni Mr. Taloza  a manamnama a mamulaan met ita iti umabot iti 1,214.90 ektaria  iti aganay a 26 a barangay ti Munisipalidad ti Cabugao. 

Insupusop pay ni Mr. Taloza    nga umab-abot ti 1,871 a bilang ti mannalon iti agmulmula iti birhinia a tabako iti ili ti Cabugao a mangitandudo iti napintas a  produksion iti maaw-awagan a “Berde a Balitok” iti Kailokuan.

Dagitoy a russuat ket resulta ti napintas a panagkammayet ti Gobierno Munisipal ken iti Ahensia ti Agrikultura a makasakup iti NTA  iti panangtarabayda kadagiti agmulmula ti Tabako a Birhinia a mangipaay iti nayon ti  masapulanda. # (Web In-Action)

No comments:

Post a Comment