Cabugao, Ilocos Sur – Segun ken ni MENRO Edgar S. Balangatan, AT, nga agpadpada a monitorenda iti pannakaidur-as iti Solid Waste ken iti Clean Up-Drive a programa ti Munisipio iti pannakapasayaat ti aglawlaw nangruna ita a bulbulan iti intero a Munisipalidad ti Cabugao.Kanaig daytoy, imbaga ni MENRO Balangatan nga agtultuloy a ka-koordinarda ti Management ti Luzon Green Art Technology, Inc. (LGA Tech., Inc.) ti kompania a nangkontrata iti pannakaidalimanek ti basura iti ili.
Sakbayna, naangay ti miting iti nagbaetan ti kompania ken ti LGU-Cabugao ket nangruna a natratar idi kadayta a miting ket iti implementasion ken natalged a pannakaiserra/ Rehabilitation Plan ti Dumpsite babaen iti DENR; Mechanics on the Disposal/Marketing iti naprodukto nga Organic Fertilizer.
Insupusop ni MENRO Balangatan a maymaysa a pakaseknan ti Munisipio iti maipapan iti Solid Waste Management ken iti Clean Up-Drive (coastal ken inland) iti intero a Munisipalidad ket insingasingna pay a komplementaran koma dagiti barangay daytoy a gannuat ti Munisipio nangruna ita a mapaspasungadan ti pannakaselebrar ti Semana Santa 2015 ken iti panagpiesta ti ili iti Abril 2015.
Kasta met nga agtultuloy a maipromot koma iti panagdaldalus iti kalsada ken arubayan kadagiti barangay babaen iti itutulong a panangmonitor dagiti Opisiales ti Barangay, segun pay ken ni MENRO Balangatan.
Dagitoy nga aksion ken inisiatiba ket bunga iti napintas a koordinasion dagiti Opisina ken Ahensia a maseknan ken adda iti salinong ti LGU-Cabugao nga idauluan ni Mayor Edgardo “Ediboy” S. Cobangbang, Jr. para iti pannakaitandudo dagiti proyekto/aktibidad nga agtultuloy a mangpasayaat iti aglawlaw ti Munisipalidad. # (Web Situational Report)
No comments:
Post a Comment