AGTULTULOY A MAIPATUNGPAL TI SOLID WASTE MANAGEMENT ITI ILI

Cabugao, Ilocos Sur – Impakaammo ni Mr. Edgar S. Balangatan, MENRO- Designate ti LGU-Cabugao  nga agtultuloy a mapaglalasin dagiti  nakolektada a basura para iti  maar-aramid a composting ken naipanda  iti disposal area. Dagitoy ket pakabuklan ti biodegradable materials (mapagrupsa)  a maipan iti Material Recovery Facility (MRF) iti kompania ti Green Innovations and Consultancy Services, Inc. (GICSI), dati nga LGA Tech., Inc., partner-company ti LGU-Cabugao  a mamagbalin  nga organic fertilizer dagiti makolektada  a basura.

Dadduma a namantener  ken   nagdur-asan a gapuanan ti Kompania a kapartner ti   LGU Cabugao iti pannakaisimpa  ti basura ket dagiti sumaganad:

1. Staff development tapno maingato  ti gapuanan  dagiti agtrabaho iti Ecology Center.

2. Napintas  nga operasion ti Central Material Recovery Facility (MRF)  a pakaus-usaran ti shredded machine iti basura sakbay a maipan iti composting bins/windrows tapno maparupsa ditoy. Maibasar iti report ti GICSI, Inc. iti bulan ti Agosto ken Setiembre 2016, umabot iti 116,450 kilos ti dagup ti nakolekta iti 14 a barangay a pakaibilangan  ti NISTC ken dagiti komersial nga establisimiento. Babaen iti rekomendasion ni SBM Dr. Jemaima S. Tan-Yee, Committee Chair on Environment a maar-aramid payen ti panagkolektada iti basura iti Lipit National High School, Brgy. Lipit, Cabugao, Ilocos Sur.

Kabayatanna, umabot met ti 72,050 kilos a kaibatogan ti 62% iti biodegradable materials ket dagitoy ti naipan iti centralized recycling facility tapno maproseso nga organiko a ganagan.

Iti sabali a bangir, umabot iti 4,100 kilos ti organic fertilizer iti naakas ken naipan iti 50 kilos kada bag. Segun iti katulagan iti nagbaetan ti LGU-Cabugao ken ti kompania, maited dagitoy a produkto ti GCIS iti Munisipio ket maiwaras kadagiti mannalon nga agusar iti organiko a ganagan para kadagiti mulada.

3. Agtultuloy a pannakaipalagip  ti panamaglalasin kadagiti mabunag a basura uray manipud iti NISTC Public Market agraman kadagiti pasdek-negosio, pageskuelaan  ken kadagiti service barangays  iti agdama.

4. Feedback Mechanism - babaen itoy a panagited ti kapanunotan ket maikkan iti gundaway dagiti Stakeholders (maseknan)  iti pannakaammo iti panagoperar ti Solid Waste Management Program ti Munisipio iti agdama.

Dagitoy nga aksion ken inisiatiba ket paset iti agtultuloy a pannakaipatungpal ti Solid Waste Management Program ti Munisipio  iti liderato ni Mayor Josh Edward S. Cobangbang babaen iti partnership ti Green Innovations and Consultancy Services, Inc. (GICSI), kapartner ti Local  Government Unit (LGU)-Cabugao babaen iti Integrated Solid Waste Program Under Public-Private Partnership Scheme agingga iti agdama. # (Web In-Action)