Cabugao, Ilocos Sur – Naaramid ti nagsaruno a Graduation ti Farmer’s Field School on Sustainable Rice Production Project with Emphasis on Palay Check kadagiti mannalon ti Barangay Baclig ken Barangay Bungro babaen iti panagbinnulig ti Department of Agriculture, Regional Field Office (DA-RFO 1), San Fernando City, La Union; OPAG-Ilocos Sur ken ti Local Government Unit (LGU)-Cabugao, Ilocos Sur iti panangidaulo ni Mayor Josh Edward S. Cobangbang.
Naaramid ti Graduation Ceremony ti Baclig FA iti Barangay Hall ti Barangay Baclig idi Oktubre 4, 2016 ket nagatendar dagiti Opisiales ti ili nga isuda Vice Mayor DJ Savellano; SBM Danny Q. Gazmen; SBM Randy B. Kinaud, Committee Chair on Agriculture kasta metten dagiti Opisiales ti Barangay nga idauluan ni Barangay Captain Carlos V. Sison.
Nagatendar met dagiti Opisiales ti DA-Provincial Office nga isuda Mr. Marcelino Alibin, Provincial Rice Program Coordinator ken ni Ms. Rose Somera, Assistant Focal Person ti organic fertilizer program.
Segun ken ni Municipal Agriculturist Robert S. Savella, dagiti sumaganad ti panggep daytoy a programa ket itultuloyda ita a Tawen 2016:
1. Pananggun-od ti kabaelan dagiti mannalon iti panagpatanor ti pagay babaen iti aktual a kapadasan manipud iti panagbunubon agingga iti panagapit.
2. Panangadalda ti amin nga aspeto iti panagtan-ay ti pagay tapno umadu ti maapit.
3. Panangbaliwda ti kadaanan a wagas ti panagmula ti pagay ket aramiden ti kabaruanan a takuat a mangingato ti matgedan.
4. Mangipasigurado ti 15% a ngatuan ti apit kada panagtalon ken 5% ti tinawen.
5. Panangpapigsada ti gimong ti mannalon ken panangnayon ti kabaelanda nga agmanehar iti naimulada a pagay.
Dagiti kangrunaan a pagsentruan ti panagadal ket iti naisibar a 5,000 metro-kuadrado a learning field a nakaipakatan iti 5 a Treatment iti uppat a klase ti pagay.
Naaramid ti panagadal iti 16 a lawas.
Buklen dagiti Lecturers nga indauluan da Mr. Nereo S. Daproza; Ms. Araceli Antonnette S. Racho ken ni Mr. Obas Bill Y. Baclig.
Iti biang ni Municipal Agriculturist Robert Savella ti DA-LGU, pinaregtada dagiti mannalon ti Barangay Baclig ken Barangay Bungro nga ikagumaananda koma nga adalen ti maited a baro a teknolohia ti panagtalon ket iyallatiwdanto iti padada nga agtaltalon para iti sapasap a pagririnnanudan.
Pinagyamanan pay ni Mr. Savella ti Gobierno Munisipal nga idauluan ni Mayor Josh Edward S. Cobangbang ken ti DA-RFO 1 nga idauluan ni OIC Regional Executive Director Valentin C. Perdido, Ph. D., ta maikkanda iti kastoy nga adal a mangiyintek iti napintas a pagbanagan iti mulada a pagay.
Malaksid kadagiti kabaruanan a teknolohia a masagsagrap ti Baclig FA ken ti Bungro FA, karamanda met kadagiti asosasion ti mannalon iti programa ti LGU-Cabugao a nakagun-od iti ramit, inputs ken makinaria iti panagtalon para kadagiti Asosasion. # (Web In-Action)
No comments:
Post a Comment