Cabugao, Ilocos Sur – Sireregta a nagturong dagiti corn farmers a tinarabay dagiti Farmer Leaders ken Barangay Officials iti 33 a barangay ti ili a Cabugao, Ilocos Sur iti sango ti Municipal Livestock Office, Cabugao, Ilocos Sur iti bigat ti Oktubre 18, 2016 tapno awatenda iti mabatayanda iti maiwaras a Ryan Corn (LVN 10) Seeds nga ited ti Provincial Government babaen iti panangidaulo ni Governor Ryan Luis V. Singson.
Sakbay ti distribusion, nagsarita ni Mayor Josh Edward S. Cobangbang. Kimmablaaw ken nagyaman iti simmangbay manen a pagimbagan dagiti umili ti Cabugao. Impaganetgetna a napintas koma ti pannakaibanag daytoy a proyekto a maited kadagiti mannalon ket taripatuenda koma a naimbag tapno magun-od ti nangato nga apit ken kalidad ti mais daytoy a cash crop.
Nagsarita met ni Municipal Agriculturist Robert S. Savella ket inlawlawagna ti pakabuklan daytoy a programa ti Gobierno Probinsial ken iti wagas a pannakaibunong ti bukel kadagiti mannalon.
Nakikaysa da SBM Atty. Randy B. Kinaud, Committee Chairman on Agriculture; SBM Danny Q. Gazmen; SBM Vicky S. Serna ken ni SBM Josefina S. Vallejo iti panagrugi ti distribusion.
Dagiti DA-LGU Personnel nga idauluan ni Municipal Agriculturist Robert S. Savella ti nagasikaso ti listaan (kada barangay) kadagiti lamisaan a pagturongan dagiti nakapila a mannalon a mangala ti mabatayanda a bukel idinto ta timmulong met dagiti pannakabagi ti Gobierno Probinsial iti pannakaiwaras dagiti nadakamat a bukel. # (Web In-Action)
No comments:
Post a Comment