NAIYENDORSO TI LGU-CABUGAO A KALIKAGUM DAGITI MANNALON, PINATGAN TI DA-RFO 1

Cabugao, Ilocos Sur – Naaramid ti pannakabendision dagiti kabarbaro a makinaria ken Farm Implement ditoy LGU-Cabugao, Ilocos Sur babaen ti  panangbendision  ni Rev. Fr. Felix Costales, Parish Priest, Cabugao Catholic Church iti Oktubre 24, 2016 idiay sango ti Cabugao Cultural and Sports Complex, Brgy. Rizal, Cabugao, Ilocos Sur.

Indauluan ni Mayor Josh Edward S. Cobangbang iti pannakai-turnover dagiti nadakamat a makinaria ken ramit ken binayabay dagiti Opisiales ti ili nga isuda Vice Mayor DJ Savellano; SBM Atty. Randy B. Kinaud, Committee Chairman on Agriculture; SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Atty. Bryan Jett S. Pano; SBM Josefina S. Vallejo; kasta metten dagiti DA-LGU Staff nga idauluan ni Municipal Agriculturist Robert S. Savella; Opisiales ti barangay a nagatendar ken maseknan nga Opisiales dagiti mannalon nga immawat dagiti nadakamat a makina ken ramit-agrikultura.

Segun ken ni Municipal Agriculturist Robert S. Savella, nagun-od dagiti nadakamat a makinaria ken ramit babaen iti naregta  a panagkalikagum dagiti maseknan nga asosasion ti mannalon ken iti babaen ti panangiyendorso ti Local Government Unit (LGU) ti Cabugao iti kiddawda  a naiturong iti Ahensia ti Departamento ti Agrikultura (DA) ken iti Opisinana iti DA-Regional  Field Office (RFO 1), San Fernando City, La Union.

Innayon ni Mr. Savella a dagiti nadakamat a makinaria ken ramit ket napatgan babaen iti Grant ken Counterpart kas iti sumaganad: maysa a Hand Tractor (Kuliglig) with Complete Accessories (Grant) a maited iti Pug-os Farmers Association-SWISA nga idauluan ni Mr. Elmer G. Bromeo; maysa a Hand Tractor (Kuliglig) with Complete Accessories ken maysa a Rice Thresher (agpada a Grant)  ken  naited iti Alina-ay Farmers Association nga idauluan ni Mr. Jovencio Selma ti Barangay Alina-ay, Cabugao, Ilocos Sur; maysa a Tractor (Ford brand) a naited iti Namnama Farmers’  Association iti Barangay  Maradodon, Cabugao, Ilocos Sur  ken nagun-od daytoy babaen iti Counterpart Scheme (90-10%).

Kabayatanna, impeksa dagiti dadaulo ti asosasion nga immawat kadagitoy a makinaria ken ramit iti panagyamanda iti Departamento ti Agrikultura (DA) iti panangawatdan kadagiti kalikagumda.