FIELD DAY TI RICE RESEARCH PROJECT, NAANGAY ITAY NABIIT

Cabugao, Ilocos Sur – Nadanon  ti panagleppas ti panagadal ken panagapit dagiti mannalon iti   Rice Research Project on Generation Varieties iti Barangay Bato, Cabugao, Ilocos Surn   babaen iti panagbinnulig ti Ilocos Norte Research and Experiment Center (INREC)-Batac, MMSU Compound, Brgy. Tabug, Batac City, Ilocos Norte ken ti LGU-Cabugao, Ilocos Sur.

Naangay ti Field Day dagiti nakipaset a mannalon ken Farmer-Cooperator  ket inatendaran dagiti Opisiales ti ili nga idauluan ni Mayor Josh Edward S. Cobangbang ken binayabay dagiti kaduana nga Opisiales nga isuda SBM Atty. Randy Baniaga G. Kinaud, Committee Chairman on Agriculture; SBM Danny Q. Gazmen; SBM Vicky S. Serna; SBM Dr. Jemaima S. Tan-Yee ken ni SBM Josefina S. Vallejo ken ni Mr. Nereo S. Daproza, Municipal Rice Program Coordinator iti naangay a Field day.

Naaramid ti Field Day iti nakaimulaan dagiti nagduduma ti  klasena  a  pagay a mayataday a patanoren dagiti mannalon a mangnayon pay iti bilang ti maapitda iti Brgy. Bato, Cabugao, Ilocos Sur. 

Immuna a naaramid ti Registration, Overview and Mechanics of the Participatory Varietal Selection of Varieties under Rainfed Ecosystem babaen ken ni Mr. Ireneo M.  Mandac, Sr. SRS.

Kalpasan ti Opening Prayer ni Ms. Rienamae Bangquirig, Agriculturist 1 ket  naisaruno ti pannakakanta ti National  Anthem babaen ken ni Ms. Vanessa Joy Marquez, SRS 1. Naisaganad ti pannakaaramid ti Panatang Maka-Palay.

Opening Remarks ti inakem ni Barangay Captain Silvano N. Jacob. Kimmablaaw ken nagyaman ti Kapitan ta saan a paudi dagiti kabarangayanna a maisagsagut kadagitoy a pagimbagan nga ilunglungalong ti LGU-Cabugao kadagiti Ahensia ti DA ken iti INREC-Batac City a sanga ti Department of Agriculture (DA)-RFO 1.

Nangted met ti mensahena ni Mrs. Wilma A. Ibea, Chief INREC. Kimmablaaw ken nagyaman iti naaramid a partisipasion dagiti mannalon iti nadakamat a barangay. Dinayawna ti masindadaan latta a panangabrasa ti LGU-Cabugao kadagiti programa ken teknolohia a maiyam-ammo kadagiti mannalon iti agdama.

Impaay ni Mr. Arturo Serrano, Farmer-Cooperator ti Presentation of Results/PVS and Agronomic Characteristics.

Nangited met ti Mensahe ni Mayor Josh Edward S. Cobangbang. Kimmablaaw ken nagyaman iti Ahensia ti DA ken ti INREC-Batac ta naynayonanda latta dagiti narugianda a pagsayaatan dagiti mannalon iti ili a Cabugao ket masindadaan met ti LGU a mangkomplementar kadagitoy a programa a mangpasayaat kadagiti mannalon iti sektor-agrikultura.

Tinarawidwidan ni Mr. Nereo S. Daproza, Municipal Rice Program Coordinator  ti naangay nga Open Forum ket naballigi a narisut dagiti pakaseknan a naidatag.  # (Web In-Action)