Cabugao, Ilocos Sur - Naaramid ti panagdalus iti sementerio babaen iti sapasap nga addaan ti minatayna partikular iti Municipal Cemetery iti Sitio Benneg, Brgy. Cuancabal, Cabugao, Ilocos Sur iti kalawasan sakbay ti pannakaselebrar ti Todos Los Santos inton Nobiembre 1, 2016.
Iti pannakiuman ti Web In-Action, imbatadda a tinawen nga ar-aramidenda daytoy tapno maragsakan met dagiti adda minatayna a sumarungkar kadagiti naitanem kadaytoy a kamposanto ti publiko.
Kabayatanna, makumikom met a napan nagdalus, nagpinta ken nag-repair dagiti umili nga adda minatayna kadagiti dadduma a sementerio a kas iti Catholic Cemetery ken ti Iglesia Filipina Independiente (IFI) Cemetery kasta pay kadagiti pribado a sementerio.
Naigameren iti tradision ken kultura ti sapasap a Filipino daytoy a panagselebrar a kas panangited ti respeto ken importansia kadagiti pimmanawen a patpatgen ti biag.
Insupusopda pay a parte daytoy a panagdalusda iti pannakaitandudo ti panagdaldalus tapno kombeniente dagiti tao nangruna dagiti sumarungkar kadagiti nitso ken tanem dagiti patpatgenda iti biag sakbay ken iti kaaldawan ti Todos Los Santos. # (Web Situational Report)
No comments:
Post a Comment