Friday, October 7, 2016

FIELD DAY HARVEST FESTIVAL TI TECHNO-DEMO, NAARAMID

Cabugao, Ilocos Sur  – Naisayangkat ti Field Day Harvest Festival  iti   pagtalonan ni Mr. Jufel Glenn Somera, Field Cooperator ti 8 Ton Technology Demonstration Project in Irrigated Areas (Wet Season 2016) iti Oktubre 7, 2016 sadiay  Barangay Arnap, Cabugao, Ilocos Sur.


Dagiti klase ti pagay a naimula ken  naidemonstrar ket iti NK-40;  TH-22; Bigante  Plus; ken ti PHB-79.




Sakbayna, naguurnong dagiti mannalon iti Field Day Site iti arubayan da Mr. & Mrs. Victorino Segui  a kaduada dagiti Opisiales ken Empleado ti DA Provincial ken ti LGU-Cabugao ket immuna a pinasiarda ti nakaimulaan dagitoy a klase ti pagay sada nagsubli iti pakaangayan ti programa a pagipresentaranda kadagiti datos iti wagas ti panangpatan-ayda kadagiti nadakamat a klase ti pagay.



Iti naangay a programa, impeksa ni Arnap Brgy. Captain Teodoro Tabula iti panagyamanna ken ragsakda a mangabrasa kadagiti programa ti DA Provincial Office, INREC-Batac City  ken  ti LGU-Cabugao  kadagiti  mannalon iti barangayda.



Nasangaili iti nasao a taripnong da Ilocos Sur Provincial Rice Program Coordinator Marcelino R. Alibin;  Mr. Kyle Connelly, Peace Corp Volunteer; Ms. Malou Cabalteja ti INREC, Batac City; Opisiales ti mannalon  nga idauluan ni Mr. Arthoro Solis, FA President ti Barangay Arnap. 




Trinatar da Mr. Nereo Daproza, Municipal Rice Program Coordinator ti pannakaisagana dagiti  naiparang a datos. 



Natalged ti rikna ni Mr. Daproza  a nagilawlawag ta  pimmasada iti 8  tonelada/ektaria nga ideal a maapit a parparuarenda  iti maysa nga ektaria itoy a panagmulada ti Hybrid Rice. 



Timmaud a saludsod  ket  iti panangdamagda iti kaaduan a sekreto  no kasano a nakaapit ti Farmer-Cooperator iti 8 tons agingga iti 10 tons no ibasar iti maysa nga ektaria.



Dinayaw dagiti  DA Officials daytoy a resulta ken nagapuanan ti Farmer-Cooperator. Ti pannakalaw-asda iti inapitda  iti 8 Tons per hectare nga ideal  a pagbasaran ket mangipakita iti nadur-as nga implementasion ti programa ti panagmulaan ti Hybrid nga itantandudo ti  Ahensia ken ti LGU ditoy ili a Cabugao, segun pay kadagiti opisiales ti DA.




Nagyaman met dagiti  mannalon agraman dagiti Opisiales ti Barangay iti Barangay Arnap ket kiniddawda iti  pannakaaramid latta ti  sabali a Techno-Demo iti sumarsaruno a panagmumula ti pagay ditoy barangay-da.



Nagsarita iti imatang dagiti mannalon da Mr. Julius Bragado, Techno-Demo Training Coordinator ti DA-Ilocos Sur kasta metten ken ni Mr. Marcelino R. Alibin a nangirepresentar ken ni Mr. Constante B. Botacion, Jr., OIC Provincial Agriculturist. Nangited met ti Mensahena ni Ms. Malou Cabalteja ti INREC, Batac City a nangibagi iti DA-RFO 1. Anag ti mensaheda kadagiti mannalon ket iti panangbigbig ken panangbagbagada  kadagiti mainayon a  makatulong iti naballigi a panagtalonda.



Nagsarita maipapan iti PCIC Update ni Municipal Agriculturist Robert S. Savella ken sinungbatanna dagiti saludsod dagiti mannalon iti naangay nga Open Forum.



Dagitoy nga aksion ken inisiatiba ket paset iti agtultuloy a  pannakaidur-as ti programa ti Agrikultura iti  Gobierno Munisipal babaen iti liderato ni Mayor Josh Edward S. Cobangbang. #  (Web In-Action)

No comments:

Post a Comment