2nd CROP TI MAIMULA A PAGAY, MAAR-ARAMID ITI 25 A BRGYS.

Cabugao, Ilocos Sur – Manmano nga agmintis ti pannakaitama ti apit iti 2nd Crop a mula a pagay  dagiti mannalon ti ili a Cabugao, Ilocos Sur. 

Adda ita 220 ektaria a natalon, 360  a bilang ti mannalon ken 25  a barangay ti ili iti pakasarakan iti  disso dagitoy a 2nd Crop Riceplants  (Nobiembre 2016 - Pebrero 2017) a kas iti sumaganad: Turod Patac; Arnap; Carusipan; Cuancabal; Lipit; Sisim; Alina-ay; Aragan; Sagayaden; Pila; Dardarat; Baclig; Daclapan; Namruangan; Cacadiran;  Bato; Nagsantaan; Maradodon; Nagsincaoan; Marga-ay; Salapasap; Rizal; Quezon;  ken Bonifacio. 

Iti pannaki-amad ti Web In-Action iti Nobiembre 3, 2016, imbatad ni Mr. Nerio S. Daproza, AT,  Municipal Rice Program Coordinator a manmano nga agmintis ti 2nd Crop ta malaksid a paboran ti tiempo ket adda pay laeng ti danum a mausar nga aggapu iti puttotda iti Cabugao River  nga usarenda a mangpatan-ay kadagiti mulada agingga iti bulan ti Pebrero a panagapitda kasta metten iti irigasion; bubon ken ubbog.

Innayonna nga uppat ti  kangrunaan a paggapuan ti suplay ti padanum kas  iti Fully irrigated canal; Shallow Tube Well (STWs); Spring (ubbog) ken ti Open water.

Kabayatanna, makatulong met dagiti irrigation canals (Private, NIA-Communal ken NIS Canal) a naaramid babaen iti panangipatungpal ti Barangay, Gimong ti  NIA-SIMABUSA, NIA-Gaco ken iti babaen ti  agtultuloy a panangtarabay ti Gobierno Lokal ti ili a Cabugao, Ilocos Sur iti pannakapasayaat dagiti  kanal  a namagkakamang kadagiti nalawa a sinilong iti pagtatalonan a pakaibilangan ti Sitio Madula, Barangay Turod Patac.

Insupusop ni Mr. Daproza a 70 % ti nakabuklanen iti naapitan kadagiti natalon idi dimmaliasat ti Supertyphoon Lawin idi Oktubre 19-20, 2016 idinto ta 30% ti saan pay a naapitan. Imbatadna a more than 100% pay laeng ti rice self-sufficiency ti Munisipalidad nupay 5% laeng ti  dadael ti apit. 

Manamnama a maapitan dagitoy a lokasion ti pagtatalonan ti 2nd Crop 2016  ket mangnayon pay iti 1,284 metrika-tonelada a produksion iti naapit iti  Wet Season 2016 (Hunio-Nobiembre). # (Web In-Action)