Cabugao, Ilocos Sur – Nagsapata dagiti napili a Young Public Servant (mangrugi iti Titulo ti Mayor, Bise Mayor ken saad iti Sangguniang Bayan agraman dagiti Ahensia a nakasalinong iti LGU-Cabugao agingga iti Department Heads ti nadumaduma nga Opisina ti LGU-Cabugao ken ni Mayor Josh Edward S. Cobangbang ita nga Nobiembre 14, 2016 kalpasan ti Flag Raising Ceremony iti imatang ti Pamilia-LGU Cabugao iti sango ti Munisipio.
Nagpaay a Facilitator ni Mr. Dario Roy A. Siruno, Municipal Information Officer a nangipakaammo daytoy nga aktibidad ket inawaganna dagiti nagan ti napili a Public Young Servant kadagiti nadumaduma a pageskuelaan ti ili ti Cabugao para iti Opisina ti Mayor, Bise Mayor agingga iti Sangguniang Bayan ken dadaulo ti Departamento ti LGU.
Pinagsapata ida ni Mayor Josh Edward iti imatang ti Pamilia-LGU ken dagiti Opisiales ti Ili.
Nangipaay ti mensahena ni Mayor Stanley Arquero. Kimmablaaw ken nagyaman iti amin a naitaripnong iti daytoy a bigat ti Lunes iti pannakaited ti naisangsangayan nga oportunidadda nga agbalin a lider. Ti anag ti mensahena ket iti panagkaykaysa; agtultuloy a panagsursuro; napasnek a panagserbisio ken iti panangaramid iti pagrebbengan nga awan ti pampanunoten a kasukatna.
Iti Mensahe ni Mayor Josh Edward, kimmablaaw ken nagyaman ta naipatungpal daytoy nga aktibidad ti Munisipio a pannakaited iti pagrebbengan kadagiti ubbing nga agad-adal a mangakem kadagiti responsibilidad dagiti Opisiales Lokal ken dadaulo ti nadumaduma nga Opisina ti LGU iti apagbiit a panawen.
Innayon ni Mayor Josh Edward a maragsakan kadaytoy a maar-aramid ta kas kenkuana a naubing nga Alkalde ket saan nga isu daytoy ti lapped iti panangipaay iti naimpapusuan ken husto a serbisio para iti kaaduan. Insupusop ni Mayor Josh Edward nga iti kinaganus ti isip dagitoy nga ubbing ket addaanda iti potensial nga agbalin a lider ket masirmata ti amin nga agtultuloy ti kinaurnos ken kinapintas ti ili a Cabugao iti masanguanan nga aldaw gapu ta mahulhulmadan dagiti sumaruno a lideres nga umallawat iti masakbayan a henerasion ti umili.
Kinarit ti Alkalde Munisipal dagitoy a Public Young Servant nga ipakitada ti panangibiagda ti naited kadakuada a pagrebbengan a mangrugi iti daytoy a petsa a panagsapatada iti akemda.
Nakikaysa iti seremonia ti panagsapata dagiti Young Public Servant dagiti Opisiales ti Ili nga isuda Vice Mayor Deogracias Jose Victorino H. Savellano; SBM Danny Q. Gazmen; SBM Vicky S. Serna; SBM Jayhan Charisma Alcid-Tan; SBM Atty. Bryan Jett S. Pano; SBM Atty. Randy Baniaga G. Kinaud; SB Secretary Maxfel S. Suboc ken ni ABC President Thaddeus “Teddy” U. Soller. # (Web In-Action)
No comments:
Post a Comment