Cabugao, Ilocos Sur – Naangay ti Ceremonial Distribution ti nagduduma a Seedlings idiay Municipal Plant and Nursery, Barangay Baclig, Cabugao, Ilocos Sur idi Nobiembre 10, 2016.
Mismo a ni Mayor Josh Edward S. Cobangbang ti nangidaulo iti pannakaiyallawat dagiti nadakamat a seedlings a kiniddaw dagiti Opisiales ti barangay; DepED; indibidual ken kameng ti NGOs a nagkumit a tumulong iti pannakapaberde ti aglawlaw iti las-ud ti Munisipalidad.
Imbatad ni MENRO Edgar S. Balangatan, AT, nga agtultuloy ti programa ti Munisipio iti Clean and Green ken Environmental Management Program a maysa kadagitoy a prayoridad nga aktibidadesda ket isu ti panagpatanoran ti seedlings a trabaho dagiti empleado iti Nursery iti agdama.
Innayon ni Municipal Agriculturist Robert S. Savella, dati a Caretaker ti Nursery nga adda umabot a 10,000 a bilang ti Seedlings ti mantenerenda a patauden iti tinawen ket tapno mapataudda daytoy a bilang, kasapulan nga agpatuboda iti seedlings babaen iti propagation scheme ken alaenda dagiti ited dagiti Ahensia a kas iti PGIS, NTA, NGOs ken iti DENR-ENRO.
Kadagiti kallabes a tawen, kinuna ni MENRO Balangatan nga umabot iti walo ribu a kapuon ti seedlings ti naiwaras iti Munisipalidad ket manamnama a naimula dagitoy babaen iti panangyuna dagiti Opisiales ti Barangay ken lumugar ken agraman iti pannakapaungar ken pannakapatan-ay dagitoy a naimula.
Dagitoy nga aksion ken inisiatiba ket gubuay ti naregget a panangilungalong ti Gobierno Munisipal maipapan iti Regreening ken iti Reforestation Program nga imatonan ti MENRO-Cabugao ken idauluan ni Mayor Josh Edward S. Cobangbang ditoy Cabugao tapno maigiya dagiti umili a mangabrasa iti natan-ok a panggep ti Gobierno Lokal a mangsalbar iti masakbayan dagiti sumarsaruno a henerasion ti sapasap nga umili. # (Web In-Action)
No comments:
Post a Comment