Cabugao, Ilocos Sur – Naruay pay laeng ti simmarungkar nga umili kadagiti minatayda kadagiti nitso ken tanem kadagiti Kamposanto nangruna iti Kamposanto Iglesia Romano Katolika iti nagmalem ti Nobiembre 2, 2016.
Nasigo a naipatungpal ti “Oplan Undas 2016” a programa ti PNP-BFP babaen kadagiti pannakabagi ti linteg a nangtarabay kadagiti agsangpet-agawid a tattao nangruna iti National Highway a pagnaanda a mabatogan ti Cabugao Public Cemetery. 
Naangay ti Misa Kamposanto (Uneg) iti 3:00pm iti deppaarna ti daya iti sementerio ti ili.
Iti pannakiamad ti Web In-Action, naballigi ti dua nga aldaw (Nobiembre 1-2) a panagselebrar ta awan ti aniaman a madi a napaspasamak iti ruar ken iti uneg dagiti sementerio, segun iti Municipal Police Station ti Cabugao ken ti MDRRMC-Cabugao.
Napintas ti koordinasion dagiti nagserbisio nga Ahensia ken Sektor babaen iti panangtarabay ti MDRRMC nga idauluan ni Mayor Josh Edward S. Cobangbang, Chairperson; ti MLGO nga idauluan ni MLG Officer Constancia L. Quinola, LGOO V; Police Chief Ramil A. Llarenas ken ni MDRRMC Officer Engr. Nestor B. Somera.
Kangrunaanna ket iti naannayas a pannakaaywan dagiti umili agraman iti Trapiko iti dua nga aldaw a panagselebrar ti Difunturom 2016, segun pay ken ni Engr. Somera. # (Web Situational Report)
No comments:
Post a Comment