Cabugao, Ilocos Sur - Nairugi ti panagsanay iti Welding Skills Training ti 19 a Trainees a naggapu iti nadumaduma a barangay ti ili a Cabugao, Ilocos Sur iti Cabugao Cultural and Sports Complex iti Nobiembre 9, 2016.
Ti panagsanay ket agpaut iti 26 nga aldaw, segun ken ni Mr. Mark Lester Acpan, Trainor manipud iti Igama Colleges Foundation, Inc., Badoc, Ilocos Norte.
Daytoy a rusuat ket ipatungpal ti LGU-Cabugao babaen iti BUB Program ken iti Technical Education and Skills Development Authority (TESDA)-Vigan City ditoy Cabugao kadagiti indibidual nga agduyos a mangpadur-as ti kabaelanda kadagitoy a teknikal a maiyadal a kasapulan ti lokalidad iti agdama.
Sakbay a narugian ti panagsanay ket nagmensahe ni Mayor Josh Edward S. Cobangbang ket kimmablaaw ken nagyaman iti TESDA ken iti panangabrasa dagiti umili iti pannakaited ti skills training babaen iti panagkammayet ti TESDA ken ti LGU-Cabugao. Kinuna ni Mayor Josh Edward a kasapulan met nga ipasnek dagiti agsanay tapno naan-anay a mapadur-as ti kabaelanda yantangay ta kabukbukodanda dayta a masursuroda ken maalada a pangpasayaatda iti panagbiagda. Insupusop ti Ama ti Ili a kitkitaenda met iti Munisipio dagiti maitulong kadagiti agsanay tapno maikkanda iti naan-anay a titulo a kas iti NC II a mabalinda nga usaren iti pannakayempleoda kalpasanna.
Binayabay ni Mr. Edgar S. Balangatan, AT, BUB Coordinator ni Mayor Josh Edward a nangpangsabay kadagiti agsanay ken mangsanay.
Maipalagip a naaramid sakbayna iti panagsanay iti Refrigeration and Air Conditioning and Plumbing iti Compound ti LGU Motorpool, Brgy. Baclig, Cabugao, Ilocos Sur idi Oktubre 27, 2014.
Kalpasan ti naaramid nga assessment babaen iti TESDA ket naammuan a naipasada ti nasao a panangamiris iti kabaelanda ket maikkan dagitoy a nag-trainee iti National Certificate (NC II) a mangipaneknek nga “skilled worker-dan” ket mabalinda nga usaren ti kabaelanda nga agtrabaho ken mangged iti ballasiw-taaw.
Daytoy a panagsanay ket naisayangkat babaen met laeng iti Bottom-up Budgeting Program ti LGU-Cabugao iti pannakikammayetda iti TESDA.
Idi Oktubre 5, 2015, inimatangan da SB Member Atty. Bryan Jett S. Pano, Committee Chairman on Social Services ken ni SBM Dr. Jemaima S. Tan-Yee iti pannakaited dagiti nasao a Certificate kadagiti nagsanay iti Opisina ni Mayor Edgardo “Ediboy” S. Cobangbang, Jr. iti Munisipio. # (Web In-Action)
No comments:
Post a Comment