Cabugao, Ilocos Sur - Nairugi ti panagsanay iti Welding Skills Training ti 19 a Trainees iti Cabugao Cultural and Sports Complex idi Nobiembre 9, 2016. Agpaut iti 26 nga aldaw, segun ken ni Mr. Mark Lester Acpan, Trainor manipud iti Igama Colleges Foundation, Inc., Badoc, Ilocos Norte iti panagsanayda. Innayon ti Trainor nga iti maikapat nga aldaw ket maaramiden ti aktual a panagsanayda.
Simmaganad a naaramid ti panagsanay iti Electrical Skills Training ti 24 a Trainees a naggapu met la iti nadumaduma a barangay ti ili a Cabugao, Ilocos Sur iti isu met la a disso idi Nobiembre 10, 2016.
Ti panagsanay ket agpaut iti 17 nga aldaw, segun ken ni Mr. Edgar S. Balangatan, AT, BUB Coordinator.
Dagitoy a programa ket ipatungpal ti LGU-Cabugao babaen iti Bottom-Up Budgeting (BUB) Program ken iti Technical Education and Skills Development Authority (TESDA)-Vigan City ditoy nga ili kadagiti indibidual a kayatna ti maaddaan iti teknikal a kurso a pangalapkapanda iti panagbiagda.
Mayataday iti anag ti mensahe ni Mayor Josh Edward S. Cobangbang iti panagyamanna iti TESDA ken iti panangawat dagiti umili iti pannakaited ti skills training. Kinuna ni Mayor Josh Edward a kasapulan koma nga ipasnek dagiti agsanay tapno mapadur-as ti kabaelanda ta mabukodanda dayta a masursuroda a pangpasayaatda ti panagbiagda. Insupusop pay ti Ama ti Ili a tamingenda ditoy Munisipio dagiti maitulongda kadagiti agsanay tapno maikkanda iti NC II Certificate a mabalinda nga usaren iti panagtrabahoda ditoy ken idiay abroad. # (Web In-Action)
No comments:
Post a Comment