Cabugao, Ilocos Sur – Naiyeskediul ti pannakaited ti libre a ganagan para kadagiti mannalon iti Barangay Lipit, Barangay Cuancabal, ken Barangay Alina-ay, Cabugao, Ilocos Sur idi Disiembre 15, 2016. Nagsasaruno a naiyallawat dagiti ganagan iti Barangay Hall dagitoy a nadakamat a barangay kadagiti mannalon.
Indauluan ni Municipal Agriculturist Robert S. Savella a kaduana ti DA-LGU Staff a nangimatang iti pannakaiyawat kadagiti mannalon kadagiti nadakamat a barangay nga idauluan da Brgy. Captain Bernardo Salom ti Barangay Lipit; Brgy. Captain Helen Savellano iti Barangay Cuancabal ken ni Brgy. Captain Melanio Santella iti Barangay Alina-ay ken nagatendaran met dagiti Opisiales ti Barangay ken iti Asosasion ti mannalon kadagita a nadakamat a barangay.
Ipaganetget ni Mayor Josh Edward S. Cobangbang iti agtultuloy a pannakaipatungpal ti programa ti Munisipio iti pannakatulong dagiti mannalon ti Cabugao. Kunana a kaikarian dagiti mannalon iti maikkan ti tulong gapu ta isuda ti kangrunaan a mangakem iti produksion ti pagtaraon ken manaynayonan pay iti sumarsaruno a panawen.
Innayon ti Alkalde Munisipal a taginayonen koma latta dagiti mannalon iti tunosda ken mangpatibker iti sektor-da a kakammayet ti LGU a mangidur-as iti Agrikultura.
Kabayatanna, impeksa dagiti mannalon ti ragsakda a kaduada dagiti Opisiales ti Barangay ken Asosasion-da kadagiti nadakamat a barangay iti naan-anay a panagyamanda iti Gobierno Munisipal nga idauluan ni Mayor Josh Edward iti agtultuloy a panangtarabay kadakuada ti Munisipio.
Daytoy a gannuat ket paset iti prayoridad a programa iti pannakaidur-as ti Benneg ti Agrikultura iti LGU-Cabugao nga idauluan ni Mayor Josh Edward S. Cobangbang tapno matulongan dagiti sapasap a mannalon iti inda panagmula iti Dry Season 2016 (Nobiembre-Mayo). # (Web In-Action)
No comments:
Post a Comment