Cabugao, Ilocos Sur – Agtultuloy a maigannuat ti panagdaldalus/panangpapintas ti buya ti aglawlaw babaen iti panangiyusuat dagiti pannakabagi ti Munisipio iti iyaasideg ti Paskua 2016 a panagsangpet dagiti Bakasionista, Balikbayan ken Turista ditoy ili a Cabugao, Ilocos Sur.
Segun ken ni MENRO-Designate Edgar S. Balangatan, AT, kaduana da Municipal Engineer Crescencio C. Formoso, Mr. Richard Pula ken ni Mr. Donnell Peralta a mangtartarawidwid kadagiti LGU Personnel nga agtitinnulong ken agtultuloy nga agdalus kadagiti pampubliko a disso a kas iti Parke, Plaza, Government Center ken iti National/Provincial Highway tapno agtultuloy a napintas ti buya iti aglawlaw.
Kabayatanna, naiplastaren ken maar-aramiden dagiti mayannatup a dekorasion para iti pannakaselebrar ti Paskua 2016 iti biang ti Munisipio kadagiti umisu a pakaipananda kangrunaan iti ikub ti Cabugao Central Park (CCP) a kas iti Belen ken iti pannakaarkos ti agrimatrimat a silaw iti aglawlaw ti Parke iti rabii.
Manamnama nga iti napintas a kooperasion dagiti pannakabagi ti LGU-Cabugao a mangipatungpal kadagitoy a trabaho ket naballigi ti pagbanagan dagiti trabaho ken programa a mailunsad iti salinong ti Gobierno Lokal iti ili a Cabugao nga idauluan ni Mayor Josh Edward S. Cobangbang iti pannakausar dagiti pampubliko a pasilidad a para iti selebrasion ti Paskua 2016. # (Web In-Action)
No comments:
Post a Comment