Cabugao, Ilocos Sur – Pinatalgedan dagiti Medical Personnel ti Municipal Health Office ti ili a Cabugao, Ilocos Sur iti pannakiuman ti Web In-Action iti Disiembre 28, 2016 nga agtultuloy ti serbisio nga ipapaay dagiti Personnel iti Cabugao Lying-in Center ken ti Rural Health Unit (RHU)-Cabugao iti napaut a Holiday Season (Disiembre 23, 2016 agingga iti Enero 3, 2017).
Kanaig daytoy, imbatad dagiti Medical Personnel ti RHU-Cabugao nga adda pito a kakaduada nga agreliebo (2 a Personnel ti kada 12 nga oras) nga agasikaso iti mapan a pasiente iti Lying-in Center ken iti RHU iti unos ti 24 oras iti aldaw uray ti aldaw ti Sabado ken iti Domingo. Dagitoy nga eskediul ket napagkaykaysaanda nga agtultuloy a maipatungpal babaen iti puersa ti Municipal Health Office-Cabugao.
Kabayatanna, bimmisita met ni Mayor Josh Edward S. Cobangbang iti RHU ken ti Lying-in Center ket maragsakan ti Ama ti Ili iti pannakaited ti serbisio-medikal kadagiti makasapul nga umili kabayatan iti napaut a bakasion.
Naammuan pay iti mapagdamagan nga awan ti naipan a biktima a maipuon iti panagselebrar ti Paskua 2016 ditoy Balay-Pagagasan ken kinompirmar ni Chief of Police Senior Inspector Ramil A. Llarenas a napintas met iti pannakamantener ti talna ken seguridad kabayatan iti selebrasion ti Paskua ditoy nga ili.
Malaksid iti agtaming iti masakit ken aganak ket tumulong dagiti nadakamat a Medical Personnel nga agdalus iti uneg ken ruar ken mangisagana iti Lying-in ken iti RHU Building iti sumaruno nga aldaw a pannakausarda.
Innayon pay dagiti Medical Personnel a kayatda nga agtultuloy a maitandudo ti Vision iti Balay Pagagasan ti ili: “Quality Health Services for a Healthy Citizenship Toward a Healthy Municipality” ita ken iti sumarsaruno pay a tawen. # (Web In-Action)
No comments:
Post a Comment