Cabugao, Ilocos Sur - Naileppasen ti Pre-Assessment ti panagsanay iti Welding Skills Training iti 19 a Trainees a naggapu iti nadumaduma a barangay ti ili a Cabugao, Ilocos Sur iti Cabugao Cultural and Sports Complex, Brgy. Rizal, Cabugao, Ilocos Sur a nangrugi idi Nobiembre 9, 2016.
Ti panagsanay ket agpaut iti 26 nga aldaw, segun ken ni Mr. Mark Lester Acpan, Trainor manipud iti Igama Colleges Foundation, Inc., Badoc, Ilocos Norte.
Daytoy a rusuat ket ipatungpal ti LGU-Cabugao babaen iti BUB Program ken iti Technical Education and Skills Development Authority (TESDA)-Vigan City ditoy Cabugao kadagiti indibidual nga agduyos a mangpadur-as ti kabaelanda kadaytoy a teknikal a maiyadal a kasapulan ti lokalidad iti agdama.
Kabayatanna, bisbisitaen met ni Mayor Josh Edward S. Cobangbang dagiti agsanay iti training site a masarakan iti Cabugao Cultural and Sports Complex kabayatan iti 26 nga aldaw a panagsanayda.
Segun pay ken ni Mr. Mark Lester Acpan, Trainor manipud iti Igama Colleges Foundation, Inc. a maaramid ti Assessment dagiti agsansanay inton Disiembre 17, 2016 iti met laeng Sports Complex babaen kadagiti pannakabagi ti TESDA.
Kalpasan ti maaramid nga Assessment ket maammuan no maipasada ti nasao a panangamiris iti kabaelanda ket maikkan dagitoy a nag-trainee iti National Certificate (NC II) a mangipaneknek nga “skilled worker-dan” ket mabalinda nga usaren ti kabaelanda nga agtrabaho ken mangged ditoy ken iti ballasiw-taaw.
Daytoy a panagsanay ket naisayangkat babaen met laeng iti Bottom-up Budgeting (BUB) Program ti LGU-Cabugao iti pannakikammayetda iti TESDA. # (Web Situational Report)
No comments:
Post a Comment