Cabugao, Ilocos Sur - Rinugianen ni Dr. Mark-Lawrence T. Tirao, 29, M.D., kabarbaro a Doktor iti Municipal Rural Health Unit iti ili a Cabugao, Ilocos Sur iti panagserbisiona iti Disiembre 5, 2016 a no sadino a ditoy ket katinnulongna pay ti maysa pay a Doktor ti RHU nga isu ni Dr. Bettina Ramos nga agagas kadagiti sakit dagiti agnaed iti barangay ken dagiti mapan agparikna nga umili iti RHU-Cabugao.
Maysa kadagiti prayoridad a programa ti Gobierno Munisipal nga idauluan ni Mayor Josh Edward S. Cobangbang ket iti agtultuloy a pannakataming ti salun-at dagiti umili tapno mamantener iti kinaregtada nga agtrabaho para iti pagsayaatan iti pamiliada ken maaramidda met iti annongenda a kas umili iti Cabugao, Ilocos Sur.
Innayon ti Mayor a nakasapulan unay ti akem ti maysa a Doktor a masindadaan nga agamiris ti sakit ken madadaan iti kaadda ti mausar nga agas nangruna kadagiti di makabael a mangisakad iti busbosenda nga agpaagas.
Ni Dr. Tirao ket nagturpos iti Preparatory Medicine Course (BS Biology) iti University of the Philippines Baguio (Baguio City) ken iti Medisina iti Our Lady of Fatima University, Valenzuela City.
Ni Dr. Tirao ket patubo iti Dagupan City, Pangasinan ken agserbisio iti dua a tawen ditoy Cabugao kas ituding iti Doctor to The Barrios Program ti DOH. # (Web In-Action)
No comments:
Post a Comment