Cabugao, Ilocos Sur – Nagtignay ti puersa ti Municipal Disaster Risk Reduction and Management Council (MDRRMC) nga indauluan ni Mayor Josh Edward S. Cobangbang, Chairperson iti idadateng ti Bagyo Nina a nagpigsa idiay Bicol Region ken nangapektar kadagiti kabaybayan nga ayuyang dagiti Bakasionista ken Turista kabayatan iti pannakaselebrar ti Paskua 2016 ditoy Pilipinas.
Inmatonan ni Engr. Nestor B. Somera ti pannakaisagana iti Operation Center ken ti pannakaimpormar ti skeletal force ti MDRRMC kasta pay dagiti kasapulanda a mausar ditoy base no kontaken dagiti natudingan a katinnulongda kadagiti calamity prone area iti Barangay ken Poblasion babaen iti Hot Lines ti MDRRMC.
Daytoy nga aksion ket panagsagana iti bigla nga isusungad dagiti kangrunaan a kalamidad kas iti bagyo ken kanaigna a didigra no adda man.
Iti pannakiuman ti Web In-Action, imbatad ni Engr. Nestor B. Somera nga inalertoda dagiti agnanaed iti igid ti kabaybayan babaen kadagiti kakaduada a mangbukel ti Cabugao Rescue a sanga ti MDRRMC iti Munisipio a mangipakaammo iti napeggad nga itatapog iti kabaybayan nangrugi iti Disiembre 26 agingga iti Disiembre 27, 2016.
Innayon ni Engr. Somera nga inaramidda ti nagtultuloy a pannaki-koordinar ken pannakitinnulongda kadagiti dadduma a Departamento ti LGU kas iti MSWDO, PNP, BFP ken MHO a kaduada a maseknan no kaspangarigan ta dumteng ti kalamidad tapno napigpigsa ti grupoda a mangaksion kadagiti pakaseknan dagiti umili nagruna kadagiti barbarangay.
Dagitoy nga aksion ken inisiatiba ket paset iti nasapa a panagsagana iti panawen ti emerhensia tapno maep-ep ti epekto dagiti dumteng a kalamidad babaen iti madagdagus a panangtarabay ti Gobierno Munisipal nga idauluan ni Mayor Josh Edward S. Cobangbang. # (Web In-Action)
No comments:
Post a Comment