Friday, December 9, 2016

UPDATE TI 2nd CROP TI PAGAY ITATTA A PANAGMUMULA

Cabugao, Ilocos Sur – Segun ken ni Municipal Rice Program Coordinator Nereo S. Daproza, adda ita 220 ektaria a matalon, 360  a bilang ti mannalon ken 25  a barangay ti ili iti pakasarakan iti  disso dagitoy a 2nd Crop Riceplants  (Nobiembre 2016 - Pebrero 2017) a kas iti sumaganad: Turod Patac; Arnap; Carusipan; Cuancabal; Lipit; Sisim; Alina-ay; Aragan; Sagayaden; Pila; Dardarat; Baclig; Daclapan; Namruangan; Cacadiran;  Bato; Nagsantaan; Maradodon; Nagsincaoan; Marga-ay; Salapasap; Rizal; Quezon;  ken Bonifacio. 

Iti pannaki-amad ti Web In-Action iti Disiembre 8, 2016,  ti Municipal Rice Program Coordinator a dandanin maileppas ti panagmulada ket  adda pay laeng ti danum a mausar nga aggapu iti puttotda iti Cabugao River nga usarenda a mangpatan-ay kadagiti mulada agingga iti bulan ti Pebrero 2017 a panagapitda kasta metten iti irigasion; bubon ken ubbog.

Innayonna nga uppat ti  kangrunaan a paggapuan ti suplay ti padanum a kas iti Fully Irrigated Canal; Shallow Tube Well (STWs); Spring (ubbog) ken iti Open Water.

Imbatadna a more than 100% pay laeng iti rice self-sufficiency ti Munisipalidad nupay 5% laeng ti nadadael nga  apit kadagiti naglabas a Bagyo. 

Manamnama a maapitan dagitoy a lokasion ti pagtatalonan ti 2nd Crop 2016-2017   ken mangnayon pay iti 1,284 metrika-tonelada a produksion iti naapit iti  Wet Season 2016 (Hunio-Nobiembre). # (Web In-Action)

No comments:

Post a Comment