Thursday, December 15, 2016

EMERGENCY SHELTER CASH ASSISTANCE, ITED TI DSWD R01 GAPU ITI TYPHOON LAWIN

Cabugao, Ilocos Sur – Nairugi nga inawat ti  umabot iti 1,800   a recipients  nga umili a nadadaelan ti pagtaenganda (partially and totally damaged)  kadagiti kallabes a panagbagyona babaen iti panangited ti Department of Social Welfare and Development (DSWD) a naidalan iti  LGU-Cabugao iti Disiembre 14, 2016 ditoy Munisipio ti Cabugao, Ilocos Sur.


Agpapada ti gatad nga inawat dagiti maseknan iti sag-P5,000 ti tunggal maysa. Idi Disiembre 10, 2016, umabot iti 300 a Recipients ti immawat iti sag-P5,000 ket iti sumaruno a pannakayeskediul ti payout iti Disiembre 14, 2016 ket manamnama a 750 a Recipients iti umawat iti sango ti Barangay Hall ti Barangay Rizal. 

Sakbay a nairugi ti Pay-out ket kimmablaaw ken nagyaman ni MSWD Officer Mrs. Lydia S. Gazmen.  Inlawlawagna ti pakabuklan ti Emergency Shelter Cash Assistance Project (ESCAP)  ti DSWD Region 1  ket pagyamananna iti agtultuloy a panangtarabay ti LGU-Cabugao nga idauluan ni Mayor Josh Edward S. Cobangbang  kasta metten  kadagiti Opisiales ti DSWD-RFO 1  ta adda daytoy a saranay kadagiti nadadaelan ti balayda iti naglabas a Bagyo Lawin. 

Iti panagsarita ni Mayor Josh Edward S. Cobangbang, kimmablaaw ken nagyaman iti Ahensia ti DSWD ta  no kaskasano ket saan a maudi ti ili a Cabugao a mairaman kadagiti cash assistance kadagiti nadidigraan ti pagtaengan ken kasta metten  nga ammo dagiti Recipients  ti mangbigbig kadagitoy a maited a tulong. 

Daytoy a dimteng a tulong manipud  iti nasional a gobierno ket  naidalan iti rehional, probinsial ken munisipal a benneg. Innayon ni Mayor Josh Edward  a daytoy ti mangipakita a dagiti empleado, department heads ken naelektaran nga opisiales ti munisipio ket ammoda a tuntonen ti pundo a sumangpet para kadagiti kailianda a direkta nga awaten dagiti benepisiario.


Insupusopna a daytoy a kabaelanda a mangpasangpet ti pundo ket maigapu iti napintas a panagkakammayetda nga Opisiales ti Gobierno Lokal nangruna iti MSWDO nga idauluan ni MSWD Officer Mrs. Lydia S. Gazmen. 

Imbatad pay ti Ama ti ili iti mariknana a ragsak ta ammoda a tuntonen ti karbenganda a serbisio iti sidong dagiti maseknan nga Ahensia.

Nasangaili ti Munisipio dagiti Paying Team ti DSWD Regional Office 1 ken  tinulongan dagiti Staff ti MSWDO nga idauluan ni MSWD Officer Lydia S. Gazmen iti pannakaurnos  dagiti papeles dagiti nag-claim nga umili sakbay nga inawatda ti mabatayanda a gatad.

Nakikaysa iti Pay-out da SBM Danny Q. Gazmen; SBM Vicky S. Serna; SBM Dr. Jemaima S. Tan-Yee; SBM Atty. Randy B.G. Kinaud ken ni SBM Josefina S. Vallejo. # (Web In-Action)

No comments:

Post a Comment