Cabugao, Ilocos Sur – Inawat dagiti agtutubo a nagtrabaho iti Special Program for the Employment of Students (SPES) a nagbuligan ti Department of Labor and Employment (DOLE)-Vigan City ken ti LGU-Cabugao kadagiti agad-adal itay bakasion 2017.
Inawat ti First Batch (50 nga agad-adal) ti gatad a kaibatogan ti bayad ti serbisioda manipud iti HRM Office ken iti panangaprobar ni Mayor Josh Edward S. Cobangbang.
Inyawat ni Mayor Josh Edward dagiti gunggona dagiti SPES Employees iti Opisina ti Municipal Mayor a binayabay ti HRMO Staff nga idauluan ni Miss Teresita Maximina “Mimi” S. Sison. Ti naited ket pakabuklan ti 60% a mabatayan ti LGU-Cabugao idinto ta iti 40 % ti ited met ti DOLE-Vigan City.
Maibatay iti rekord ti Human Resource Management Office (HRMO) ti LGU-Cabugao, nagtrabahoda kadagiti Opisina iti nadumaduma a Departamento ti LGU a nakaidesignaranda. 30 nga aldaw ti naituyang a panagtrabaho ti tunggal maysa kadagitoy nga estudiante a naggapu kadagiti pageskuelaan.
Iti pannakiuman ti Web In-Action kadagiti nagtrabaho, imbatadda nga agyamyamanda unay iti LGU-Cabugao ta dakkel ti maitulongna iti panagtrabahoda a nakateggedanda iti gastosenda nga agbasa.
Kabayatanna, nangrugi metten dagiti 2nd Batch SPES Employees iti Hunio 2017. Maikkanda met iti maipada a pribilehio a kas iti 1st Batch. (Web In-Action)
No comments:
Post a Comment