Cabugao, Ilocos Sur - Maipampamaysa ita ti panangdanon dagiti Staff ti DA-LGU Cabugao nga idauluan ni Municipal Agriculturist Robert S. Savella kadagiti mannalon (by schedule) iti 33 a barangay ti Munisipalidad ti Cabugao tapno tulonganda ti PCIC Staff a mangpapirma kadagiti kasapulan a pormas iti pannaka-insure dagiti mula dagiti mannalon a pagay ita a Wet Season 2017 (Hunio-Nobiembre) agraman ti mismo a pisikal a bagi ti maseknan a mannalon.
Nangrugi ti nasaknap a trabahoda ita a bulan ti Hunio 1 iti Tawen 2017. Tallo a barangay ti kada aldaw iti papananda agingga a mawanas iti 33 a barangay ti ili.
Kabayatanna, impadamag ni Mr. Savella nga awan ti rimsua a problema ti panangaksion ti PCIC kadagiti pakaseknan dagiti mannalon itay Dry Season 2016-2017 (Disiembre-Mayo) ta nabayadan dagiti “crop damages” a napabisita.
Innayon pay ni Mr. Savella a manamnama nga adu ti agrehistro ken agkameng iti PCIC iti dagup ti dandani ag-4,512 a bilang ti mannalon ket ad-adu ti maiserrek a matalon nupay saan met a maidawdawat iti idadateng ti kalamidad a kas iti bagyo ken layus.
Ti pannakaipaay ti libre a pannakabayad (allocation) iti panagpa-insure ti pagay ket paset iti programa iti Ahensia ti PCIC nga adda iti salinong ti DA ita a Tawen 2017.
Dagitoy nga aksion ken inisiatiba ket resulta iti agtultuloy ken nakammayet a programa ti Gobierno Munisipal nga idauluan ni Mayor Josh Edward S. Cobangbang ken iti DA-RFO 1-PCIC tapno matulongan ti kasasaad dagiti mannalon/umili iti pannakaital-o ti kasasaad ti panagbiagda babaen iti mainayon a matgedanda iti panagpatanoran ti pagay ita a Wet Season 2017 (Hunio-Nobiembre). # (Web In-Action)
No comments:
Post a Comment