Cabugao, Ilocos Sur – Naileppas ti panagsanay (Hunio 13, 14, 15, 2017) iti tallo a bansada dagiti Opisiales ti Barangay ken kameng ti Barangay Tanod iti 33 a barangay tapno maiyatadayda ti plano ti Gobierno Nasional a mapagbalin a naan-anay a katulongan ida ti Kapolisan iti krusada maikontra iti illegal drugs; kriminalidad ken corruption a dinakamat ni MLGO Officer Constancia “Connie” Lazo Quinola a kangrunaan a pakabuklan dagiti maiyadal kadagiti agseminar.
Kalpasan ti Opening Prayer ken ti pannakakanta ti Philippine National Anthem, immuna a naglektiur ni Police Chief Inspector Augusto P. Cabello, Jr., kabarbaro a Hepe ti Polisia iti ili a Cabugao a nagsarita. Bininsana ti kaipapanan iti Masa Masid (Mamamayang Ayaw Sa Anomalya - Mamamayang Ayaw Sa Iligal na Droga) ken iti akem dagiti agseminar a katulongan dagiti Law Enforcers. Nangited pay iti updates iti ar-aramiden ken pagrebbengan dagiti Kapolisan iti Munisipalidad.
Simmaruno a naglektiur ni MLG Officer Connie Quinola ket impasagepsepna iti panggep ti programa a Masa Masid kadagiti nagseminar. Innayonna a daytoy a programa ket Community-Based Reform Program ti Gobierno Nasional ket saan laeng a dagiti Opisiales ti adda pagrebbenganna a makigamulo no di pay ket agtitinnulong dagiti maseknan a sektor tapno agballigi iti panggep daytoy a programa ni Presidente Rodrigo Roa Duterte.
Innayon ni Mrs. Quinola nga iti UBAS (Ugnayan sa Barangay at Simbahan) Technical Working Group ket responsable a mangipromot iti MASA MASID ken mangipaay iti technical assistance iti MASA MASID Team iti kada barangay.
Insupusopna a ti Barangay MASA MASID Team ket buklen dagiti representatives ti faith-based organizations, civil society organizations (CSOs), non-government organizations (NGOs), people’s organizations (POs), ken ti CSO representative manipud iti Barangay Peace and Order Council (BPOC) ken iti Barangay Anti-Drug Abuse Council (BADAC).
Nangited met iti pammatigmaan ni ABC President Thaddeus “Teddy” U. Soller kadagiti nagsanay idinto ta naglektiur met ni Mr. Arvin Jay Manauis, Staff iti Office of the Mayor maipapan iti “Federalism” nga itantandudo ti Gobierno Nasional. # (Web In-Action)
No comments:
Post a Comment