Cabugao, Ilocos Sur – Maibasar iti Direktiba ti Department of Health (DOH), naselebraran ti bulan ti Hunio iti National Dengue Awareness Month babaen iti Tema:
“Eskwelahan, Simbahan, Barangay, Palengke at Buong Komunidad, Sama-Sama Nating Sugpuin ang Dengue”.
Nakipagselebrar ti LGU-Cabugao babaen iti panangiwardas dagiti Personnel ti Cabugao Municipal Health Office nga idauluan da Dr. Mark-Lawrence T. Tirao ken ni Public Sanitary Inspector Jeanette Garcia ket maysa kadagiti tinamingda iti panagturongda kadagiti pageskuelaan-sekundaria ti ili iti bulan ti Hunio ket impaganetgetda iti panangannurotda iti panagaramid kadagiti aktibidad a manglapped iti panagraira daytoy a naranggas a sakit ken nagitedda iti material a pangkontra iti dengue.
Kanaig daytoy, ti programa a Center for Health Development (CHDs) ti DOH ket kakammayetna ti LGU-Cabugao a nangaramid kadagiti aktibidad a nangipromot kadaytoy a gannuat.
Buklen ti nasao nga estratehia iti pananglaban ti dengue babaen iti panangadaptarda iti DOH 4S Kontra Dengue: Search and Destroy, Seek early consultation, Self-protective measures and Say no to indiscriminate fogging.
Maibasar iti rekord ti RHU, epektibo ti pannakaipakat ti “Operation Taob” kadagiti barangay a panangibukbok kadagiti naurnong a danum/tudo kadagiti goma, bote ken lata tapno saan a pagitlogan ti lamok ken ar-aramidenda latta ti information initiatives kontra iti dengue. Panagdaldalus ti aglawlaw ken madalusan dagiti nasamek a disso a posible a pagyanan ti lamok ti kaskenan pay nga maaramid. Sumarsaruno ti defogging a mausar a pangkontra iti makadangran a lamok no kumaro ti situasion.
Dagitoy nga aksion ken inisiatiba ket gubuay iti nasamay a programa iti pananglapped ti panagsaknap manen ti nadakamat a sakit babaen iti panangitandudo ti Gobierno Munisipal nga idauluan ni Mayor Josh Edward S. Cobangbang tapno masalbar dagiti umili nangruna dagiti ubbing iti pannakakagat ti agdangran a lamok kadagitoy a matutudo a bulbulan. # (Web In-Action)
No comments:
Post a Comment