Wednesday, June 7, 2017

ANIMAL CARE/DISEASE PREVENTION PROGRAM TI MUNISIPIO, MAIPAMPAMAYSA

Cabugao, Ilocos Sur – Iti pannaki-amad ti Web In-Action ken ni Municipal Agriculturist Robert S. Savella  itay nabiit, imbagana nga agtultuloy  nga idauluan ni  Dr. Melvin G. Castro, DVM,  Municipal Livestock Coordinator  ti DA-LGU Cabugao iti papanda panagbisita ken panagagas iti sakit a kumpet ken rumsua kadagiti dadakkel nga ayup  ken dinguen. Iti benneg ti Livestock Office,  ti mangidanon iti serbisio kadagiti 33 a barangay ti ili iti inaldaw a maaramid tapno masigud a maprebentaran dagiti rumsua a sakit ti animales.

Innayon ni Dr. Castro a makikokoordinarda kadagiti Opisiales iti papannda iti  barangay ta kabaelanda a mobilisaren a daras dagiti adda ayup ken dinguenna tapno matamingda iti mammaminsan nga eskediul.  

Malaksid iti ragup a kas iti grupo/barangay  a panagbakunada ket maangay met latta  iti indibidual a wagas nangruna kadagiti adda sakit ti dinguen ken ayupda a kasapulan pay a makita ken maagasan. Ket uray iti aldaw ti Sabado ken Domingo iti pannakasango dagiti maseknan ket mismo a ni Dr. Castro ti agdisnudo a mapan.

Dagitoy nga aksion ken inisiatiba ket resulta iti agtultuloy a programa ti Animal Care and Disease Prevention ti Gobierno Munisipal nga idauluan ni Mayor Josh Edward S. Cobangbang tapno naan-anay a maidur-as ti livestock  sector  babaen iti pannakapapigsa ti  panagtaraken kadagiti ayup ken dinguen  a katulongan iti panagmulmula ken panagkalap  a pamastrekan dagiti mannalon ken umili. # (Web In-Action)

No comments:

Post a Comment