Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon koma ti tudo iti kangrunaan a kasapulanda tapno mapalawada iti matalonda ita a Wet Season 2017 (Hunio-Nobiembre).
Nupay kasta, kaaduan ita iti manam-ayan iti kaadda ti naited a pangrugian a bukel babaen iti programa ti Gobierno Munisipal ken ti DA-RFO 1 a mausar iti panagbunubonda ken kasta metten a dakkel a katulonganda dagiti nagun-odda a Farm Machineries & Farm Implements.
Maibasar iti rekord ti DA-LGU, immabot ti 4,600 a bilang ti mannalon a nangbukel iti 35 a rehistrado nga asosasion ti mannalon iti naikkan iti pamalpalatpatan iti Cropping Calendar & Pattern of Planting iti kallabes a Wet Season 2016 babaen iti naaramid a meeting sakbay iti nasaknap a panagbunubonda. Daytoy nga aksion ket ar-aramiden ita dagiti Staff ti DA-LGU nga idauluan ni Municipal Agriculturist Robert S. Savella.
Iti kallabes a Wet Season 2016, natun-oyan iti 1, 283 ektaria a natalon iti rainfed area ken
umabot met iti 971 ektaria iti irrigated area ket nagkair nga
2,204 ektaria ti natalon iti intero a Munisipalidad. Manamnama a matun-oyan wenno manayonan pay ti bilang iti ektaria ti matalon iti agdama a panagtatalon.
Kanaig daytoy, nailunsad ita a Wet Season 2017 dagiti Municipal Techno-Demo Farm kadagiti estratehiko a lugar; Seed Production ken kasta metten iti Farmer’s Field School (FFS) in Rice Production kadagiti estratehiko a disso kadagiti 35 a barangay ti ili. Dagitoy a demonstration area iti panagtalon ket tinawen a maar-aramid a pagtuladan dagiti mannalon a pagtitinnulongan dagiti Ahensia a kas iti DA-RFO 1; OPAG-Ilocos Sur; Agriculture Training Institute (ATI)- Region 1; Ilocos Norte Research Experimental Center (INREC-Batac) ken iti LGU-Cabugao nga idauluan ni Mayor Josh Edward S. Cobangbang.
Dagitoy nga aksion ken inisiatiba ket gubuay iti napintek a programa ti Gobierno Munisipal nga idauluan ni Mayor Josh Edward S. Cobangbang tapno makomplementaran iti regta dagiti mannalon nga agpataud iti umanay a suplay a pagtaraon dagiti umili ken mangnayon iti masapulanda agsipud ta mayoridad dagiti umili iti agdepende iti kangrunaan a pagbiaganda iti Agrikultura ditoy nga ili. # (Web Situational Report)
No comments:
Post a Comment