Cabugao, Ilocos Sur – Iti pannaki-amad ti Web In-Action, impakaammo ni Dr. Mark-Lawrence T. Tirao, M.D. iti Municipal Health Office ti ili a a kangrunaan unay ita iti panagan-annad ti maysa nga indibidual tapno saan a makapet kadagiti sakit iti nadaras a panagbaliw ti klima.
Innayon ni Dr. Tirao a malaksid iti panateng-uyek a pakadlawan pay ti sintomas dagiti nakaro a sakit, panawen pay ita ti panagkakawa. Ipalpalagip latta ti Doktor a kangrunaan ita iti panagdaldalus, ehersisio, balance-diet, inana ken recreation ken dadduma pay nga annuroten iti natibker a salun-at tapno nasimbeng latta ti immunity system (salaknib) ti bagi iti saksakit.
Kas iti gagangay, adu ti bilang ti umili nga umay nga inaldaw nga agpaagas iti RHU pakaseknan iti medical check-up, pa-Blood Pressure (BP), Dental, Pre-natal, Immunization a buklen dagiti inna, maladaga, ubbing, agtutubo, lallakay ken babbaket.
Kabayatanna, maidanon pay ti serbisio ti salun-at kadagiti Barangay Health Station kadagiti barangay babaen iti mayeskediul a papan dagiti Nurses Deployment Program (NDP) Nurses a nakadestino iti RHU.
Dagitoy nga aksion ken inisiatiba ket maigapu iti agtultuloy a panagkammayet ti LGU-Cabugao nga idauluan ni Mayor Josh Edward S. Cobangbang ken ti Ahensia ti DOH iti pannakaipromot ti programa para iti salun-at dagiti umili. # (Web In-Action)
No comments:
Post a Comment